Almatyda qala ákimdigi ǵimaratyn basyp alý kezindegi tártipsizdikterge belsendi qatysty degen kúdiktiler ustaldy, - dep habarlaidy Tengrinews.kz tilshisi Bas prokýratýranyń baspasóz qyzmetine silteme jasap.
Bas prokýratýra málimetinshe, qańtardaǵy lańkestik áreketter men tártipsizdikterge qatysty tergep-tekserý jalǵasyp jatyr. Jekelegen epizodtar boiynsha qylmystarǵa qatysy bar kúdiktiler anyqtalyp, ustalǵan.
"2022 jylǵy 5 qańtarǵa qaraǵan túni Almatyda qala ákimdigi ǵimaratyn basyp alý kezindegi tártipsizdikterge belsendi qatysqan eki shetel azamaty anyqtaldy.
Olar ǵimaratty qorǵap júrgen Mamandandyrylǵan kúzet qyzmetiniń qarýsyz qyzmetkerlerine qarsy qatygezdikpen kúsh qoldanǵan. Olar politseilerden quraldaryn (qalqandar, taiaqshalar) tartyp alyp, uryp-soqqan", - delingen habarlamada.
Vedomstvo málimetinshe, qylmyskerlerdiń jeke basy beinematerialdardy sáikestendirý nátijesinde anyqtalǵan.
"1 aqpanda sot sanktsiiasy boiynsha, kúdiktiler qamaýǵa alyndy. Olardyń qylmystyq áreketteri Qylmystyq kodekstiń 272-baby 2-bóligi ("Jappai tártipsizdikterge qatysý"), 380-baby 3-bóliginiń 1,4-tarmaqtary ("Bilik ókiline kúsh qoldaný") boiynsha saralandy", - delingen habarlamada.
Sondai-aq, habarlamada 2022 jylǵy 6 qańtarda qylmyskerler teleefir uiymdastyrý maqsatynda "Kók tóbe" telemunarasyn basyp alýdy josparlaǵany kórsetilgen. Vedomstvo málimetine súiensek, osy maqsatta kúdiktiler beibit turǵyndardy birlesip qylmys jasaýǵa úgittegen jáne olardyń ómirine qaýip tóndirgen.
"1992 jyly týǵan azamat bas tartqan soń qylmyskerler oǵan myltyqpen eki ret oq atqan, nátijesinde jábirlenýshi qolynan jáne jynys músheleri tusynan jaraqat alǵan. Qylmystyń uiymdastyrýshysy ustaldy, ol buryn sottalǵan 1983 jyly týǵan Almaty qalasy mańynyń turǵyny bolyp shyqty. Ol 25 qańtarda sot sanktsiiasy boiynsha qamaýǵa alyndy", - delingen habarlamada.
