Qaterli isiktiń asqynǵan túrimen aýyratyn bir naýqasty emdeý úshin jylyna 30 mln teńgeden astam qarajat jumsalady. Bul týraly Dúniejúzilik limfomalarmen kúres kúnine orai suhbat bergen Nur-Sultan qalasy ákimdigi kópsalaly meditsina ortalyǵynyń direktory Muhtar Tóleýtaev málimdedi, dep habarlaidy QazAqparat tilshisi.
«Onkologiianyń 3,4-shi satysyndaǵy bir naýqasty emdeý úshin jylyna 30 mln teńgeden astam qarajat jumsalady. Bul bizdiń emdeý mekemesi úshin óte aýyr. Buǵan qosa, asqynǵan túrdegi isik dertinen tolyq saýyǵyp ketý múmkindigi az», - dedi Nur-Sultan qalasy ákimdigi kópsalaly meditsina ortalyǵynyń direktory Muhtar Tóleýtaev.
Sondai-aq, Muhtar Esenjanuly emdelý úshin Eýropa elderine baratyn azamattar sany jyl saiyn artyp kele jatqanyn málimdedi.
«Bizdiń sanamyzda «shetelde bári jaqsy» degen uǵym qalyptasyp qalǵan. Oǵan qosa, obyr aýrýyn biznestiń kózine ainaldyrǵandar bar. Máselen, qazir Eýropada jaqsy em kórsetedi, tez saýyǵyp ketýge múmkindik mol degen jarnamalar kóp. Osyndai aqparatqa senip, ózge jaqqa ketetinder az emes. Otandyq meditsina olardan kem túspeidi jáne QR kez kelgen azamaty tegin, memleket esebinen emdeledi. Al shetelge baryp, em alǵan azamat eń keminde 50-60 myń AQSh dollaryn jumsaidy», - dep málimdedi Muhtar Tóleýtaev.
Budan ózge, onkolog-dáriger qaterli isikpen aýyryp, oǵan qosa koronavirýs juqtyrǵan naýqastar týraly derekti bólisti.
«Osy ýaqytqa deiin qaterli isikpen aýyratyn 200-ge jýyq azamat koronavirýs juqtyrdy. Infektsiianyń kesirinen 14 naýqas kóz jumdy. Olar onkologiianyń 3,4-shi satysyndaǵy adamdar. Aýyr jaǵdaida jatqan azamattardyń aýrýyn koronavirýs odan saiyn órshitip jiberdi. Al 180-ge jýyq adam qajetti emin alyp, qazrgi tańda úiine oraldy», - dedi dáriger.
Muhtar Tóleýtaevtyń aitýynsha, qazaqstandyqtar alǵashqy aýrý belgileri paida bolǵanda dárigerdiń kómegine júginbeidi. Jyl saiyn uiymdastyrylatyn skriningten ótýge de kópshiligi kelmeitin kórinedi.
«Qalypty jaǵdaida buryn-sondy bolmaǵan aýrý belgileri paida bolsa, birden dárigerdiń kómegine júgingen abzal. Ol obyrdyń 1,2-shi satylarynda diagnoz qoiyp, em-dom sharalaryna kirisip ketýge múmkindik beredi. Al bizdiń azamattar dertin asqyndyryp, amaly qalmaǵan kezde keledi. Budan bólek, obyrdyń basqa da aýrýlar siiaqty únemi mýtatsiiaǵa túsip otyratynyn eskergen jón. Isik aǵzada damyǵandyqtan, onda barlyq adam boiyndaǵy kletkalar ornalasady. Isik jii mýtatsiiaǵa ushyraǵandyqtan, dári-dármekke tez beiimdeledi. Iaǵni, qoldanylyp júrgen dári az ýaqyttan soń áser etpei qalýy múmkin. Sondyqtan onyń ózgergen túrin arnaiy tásildermen anyqtap, ári qarai aýyr dári qoldanýǵa týra keledi», - deidi onkolog-dáriger Muhtar Esenjanuly.
Muhtar Tóleýtaevtyń málimetinshe, biylǵy 1 qańtardaǵy jaǵdai boiynsha 187 myńnan astam qazaqstandyq qaterli isikke shaldyqqan. Iaǵni, árbir 100 myń adamnyń 76-synda obyr bar. Al atalǵan dertten 2019 jyly qaza bolǵandar sany - 14 145 adam.
