Fýtboldan Ispaniia quramasy Katardaǵy álem chempionatyn iri jeńispen bastady, - dep habarlaidy Massaget.kz.
"Ál-Týmama" stadionynda ispaniialyqtar Kosta-Rika quramasymen kezdesti. Úziliske deiin ispan fýtbolshylary úsh gol soǵyp tastady. 11-minýtta Dani Olma kózge tústi. Taǵy on minýttan soń Marko Asensio qanjyǵasyn mailady. 31-minýtta Ferran Torres penaltiden gol soqty.
2010 jylǵy álem chempiony ekinshi taimda da qarqynyn báseńdetpedi. 54-minýtta Torres dýbl avtory atandy. Al 74-minýtta Gavi ispaniialyqtardyń besinshi golyn soqty.
Eýropalyq qurama munymen de toqtap qalmady, Karlos Soler enshisine bir gol jazdy. Al match núktesin Alvaro Morata qoidy - 7:0.
Osylaisha, Ispaniia quramasy iri jeńiske qol jetkizip, úsh upaimen E tobynda kósh bastady. Úsh upaiy bar Japoniia azyraq gol soqqany úshin ekinshi orynda tur. Germaniia úshinshi, Kosta-Rika tórtinshi orynda keledi.
Endi Ispaniia kelesi matchyn 27 qarashada Germaniiaǵa qarsy ótkizedi. Al Kosta-Rika sol kúni Japoniiamen kúsh synasady.
