QR Premer-Ministri Asqar Maminniń tóraǵalyǵymen ótken Úkimet otyrysynda QR Prezidenti Qasym-Jomart Toqaevtyń aǵymdaǵy jyly 10 shildede ótken Úkimettiń keńeitilgen otyrysynda bergen tapsyrmalaryn oryndaý boiynsha sharalar qaraldy, dep habarlaidy "Ult aqparat".
«Qatań karantindik shekteý sharalarynyń ekinshi aptasy ótip jatyr. Aýrýdyń taralý qarqyny turaqtalýda. Densaýlyq saqtaý ministrliginiń usynysy boiynsha, epidemiologiialyq ahýaldy odan ári turaqtandyrý úshin elde shekteý sharalaryn taǵy 2 aptaǵa, 20 shildeden bastap 2 tamyzǵa deiin uzartý týraly sheshimdi qabyldap otyrmyz», — dep Úkimet basshysy karantindik talaptardy qatań saqtaýǵa shaqyrdy jáne ortalyq memlekettik organdar men ákimdikterge karantindi odan ári saqtaýdyń barlyq sharalaryn iske asyrýdy tapsyrdy.
A. Mamin dári-dármektiń qajetti qory bar ekenin, ári únemi tolyqtyrylyp otyratynyn atap aitty. Bul rette olardy dárihana jelileri men statsionarlarǵa naqty bólý boiynsha barlyq sharalardy qamtamasyz etý qajet. Atyraý jáne Mańǵystaý oblystarynda epidemiologiialyq jaǵdaidy turaqtandyrý úshin qosymsha tiisinshe 102 jáne 56 joǵary bilikti maman jiberildi.
«Memleket basshysynyń tapsyrmasy boiynsha shekteý sharalary kezeńinde tabysynan airylýy boiynsha áleýmettik járdemaqy – eń tómengi jalaqy mólsherindegi 42 500 teńgeni bir aiǵa tóleý týraly sheshim qabyldap otyrmyz. Tólem karantin sharalarynyń kúsheitilýine bailanysty jumysy shektelgen jumys berýshilerdiń, jeke kásipkerler men ózin-ózi jumyspen qamtyǵandardyń ótinimi negizinde júrgiziledi», — dedi A. Mamin.
Úkimet basshysy tótenshe jaǵdai kezindegidei, azamattardyń jekelegen sanattaryna (bul – 1 millionnan astam adam) azyq-túlik ónimderin alýǵa aqshalai kómek berýdi jalǵastyrýdy, osy jylǵy úshinshi toqsanǵa ataýly áleýmettik kómekti taǵaiyndaýdy qolda bar derekter negizinde (128 myńǵa jýyq otbasy) aldyn ala júrgizýdi, sondai-aq múgedektigin qaita kýálandyrý merzimi karantin kezeńine tap kelgen adamdardyń (shamamen 30 myń adam) múgedektigin úsh aiǵa avtomatty túrde uzartýdy tapsyrdy.
Densaýlyq saqtaý ministrliginiń usynysy boiynsha bilim, tsifrlandyrý ministrlikterine jáne ákimdikterge aǵymdaǵy jyldyń 1 qyrkúieginen bastap, jańa oqý jylynyń birinshi toqsanynda orta bilim berý uiymdarynyń qashyqtan oqytýǵa daiyndyǵyn qamtamasyz etý tapsyryldy. Sonymen qatar, qajet bolǵan jaǵdaida jáne bastaýysh synyp oqýshylarynyń ata-analarynyń jazbasha ótinishi boiynsha, sanitarlyq-epidemiologiialyq talaptardy qatań saqtai otyryp, «kezekshi» synyptardyń jumysy qamtamasyz etiletin bolady.
Premer-Ministr áleýmettik-ekonomikalyq ahýaldyń nasharlaýy jaǵdaiyna halyq pen biznesti qoldaý boiynsha qosymsha is-qimyl josparyn daiyndaýdy tapsyrdy. Bul rette biýdjet qarajatyn tiimdi jumsap, infliatsiia deńgeiin 8-8,5% deńgeiinde ustaýdy qamtamasyz etetin aqsha-nesie saiasatyn júrgizý qajettigi ataldy.
Indýstriia jáne infraqurylymdyq damý ministrligine ákimdiktermen jáne «Atameken» UKP-men birlesip, taýarlardy satyp alý jáne qurylys jumystaryn júrgizý kezinde jergilikti qamtý úlesin ulǵaitý, sondai-aq óńdeý ónerkásibiniń jobalaryn iske asyrýdy keńeitý týraly tapsyrma berildi.
«Aýyl sharýashylyǵy ministrligine osy aptanyń sońyna deiin Jer reformasy jónindegi komissiiany qurý týraly sheshim jobasyn engizýdi tapsyramyn. Komissiia jer resýrstaryn odan ári paidalaný boiynsha naqty usynystar daiyndaýy qajet», — dedi A. Mamin.
Úkimet basshysy Premer-Ministrdiń birinshi orynbasary Á. Smaiylovqa Qyzylorda oblysynyń áleýmettik-ekonomikalyq damýynyń ózekti máselelerin pysyqtap, eki apta merzimde sheshim jobasyn engizýdi tapsyrdy.
Ákimdikterge Eńbek jáne halyqty áleýmettik qorǵaý ministrligimen birlesip, «Jumyspen qamtýdyń jol kartasy» baǵdarlamasyn tiimdi iske asyrýdy qamtamasyz etý jáne turaqty jumys oryndaryn qurý sanyn ulǵaitý júkteldi.
Premer-Ministr Memleket basshysy qoiǵan mindetterdiń barlyǵy naqty oryndalýy tiis ekenin atap aitty.
«Árbir basshy olardyń iske asyrylýyna jeke jaýapty bolady», — dedi A. Mamin.
Jiynda Densaýlyq saqtaý ministri A. Tsoi, ulttyq ekonomika ministri R. Dálenov, Ulttyq bank tóraǵasy E. Dosaev, indýstriia jáne infraqurylymdyq damý ministri B. Atamqulov, qarjy ministri E. Jamaýbaev, eńbek jáne halyqty áleýmettik qorǵaý ministri B. Nurymbetov, tsifrlyq damý, innovatsiialar jáne aeroǵarysh ónerkásibi ministri A. Jumaǵaliev, aýyl sharýashylyǵy ministri S. Omarov, ekologiia, geologiia jáne tabiǵi resýrstar ministri M. Myrzaǵaliev, bilim jáne ǵylym ministri A. Aimaǵambetov, «Atameken» UKP basqarma tóraǵasy A. Myrzahmetov baiandama jasady.
