QR Ishki ister ministri Erlan Turǵymbaev elimizde engiziletin qatań karantin sharalaryna bailanysty qazaqstandyqtarǵa málimdeme jasady, dep habarlaidy QazAqparat Polisia.kz saityna silteme jasap.
«Qurmetti otandastar! Koronavirýs infektsiiasynyń taralýyna bailanysty Memlekettik komissiia 5 shildeden bastap eki aptalyq ishinara shekteý engizý týraly sheshim qabyldady. Bul shekteýler arqyly jekelegen shaǵyn jáne orta biznes sanattarynyń qyzmetin toqtatý, qoǵamdyq kólikterdiń jumysyn jáne adamdar kóp baratyn jerlerde azamattardyń jinalýyn shekteý, sondai-aq buqaralyq is-sharalar ótkizýge tyiym salý qarastyrylǵan. Munyń bári infektsiianyń taralýyna jol bermeý úshin jasalady.
Kásiporyndar, azyq-túlik dúkenderi, dárihanalar, bankter jáne qysqartylǵan keste boiynsha HQO-lar jumys isteitin bolady.
Bizdiń azamattarymyz qazaqstandyqtardyń ómiri men densaýlyǵyn saqtaýǵa baǵyttalǵan sanitarlyq jáne aldyn alý sharalaryn qatań saqtaitynyna senimdimin.
Osy kezeńde ishki ister organdary qyzmet ótkerýdiń erekshe rejimine kóshiriletin bolady. Osyǵan bailanysty, Ishki ister ministrligi azamattardy áleýmettik qashyqtyq pen maska rejimin saqtaýǵa, kóp adam shaqyrylatyn is-sharalar ótkizbeýge jáne ózderiniń bailanystaryn azaitýǵa shaqyrady», - dedi ministr.
Sondai-aq E.Turǵymbaev politseiler densaýlyq saqtaý organdary men sanitarlyq-epidemiologiialyq qyzmetterge koronavirýstyń taralý oshaqtaryn oqshaýlaý, shekteý sharalaryn qamtamasyz etý baǵytynda jan-jaqty kómek kórsetýdi jalǵastyrady.
«Sonymen qatar, tek qana resmi aqparat kózderine ǵana sený mańyzdy. Kórineý jalǵan málimetterdiń avtorlary men taratýshylary anyqtalyp, jaýapkershilikke tartylatyn bolady. Engiziletin shekteýlerdiń tiimdiligi árqaisymyzdyń jeke jaýapkershiligimizge bailanysty.
Tek birlesken kúsh-jiger, shydamdylyq pen túsinistik kórsete otyryp, qyzmet atqaryp júrgen meditsina qyzmetkerleri men politseilerge qoldaý kórsete alamyz. Biz bul qaterge birlese qarsy turǵanda ǵana azamattarymyzdyń qaýipsizdigin qamtamasyz etip, densaýlyqtaryn saqtap qalamyz!», - dedi vedomstvo basshysy.
Eske salaiyq, Qazaqstanda koronavirýsqa qatysty epidemiologiialyq ahýaldyń órshýine bailanysty biylǵy 5 shildeden bastap 14 kúnge qatań shekteý sharalary engiziledi. Karantin odan ári uzartylýy nemese kúsheitilýi múmkin.
