Shyǵys Qazaqstan oblysynda sý tasqyny jaǵdaiy asa kúrdeli. Bul týraly búgin Úkimet otyrysynda QR Ishki ister ministri Qalmuhanbet Qasymov aitty, dep habarlaidy QazAqparat.
«Shyǵys Qazaqstan oblysynda jaǵdai asa kúrdeli. Qazirgi tańda onda 396 úi men 185 aýla sý astynda qalyp otyr. Osyǵan bailanysty Semei qalasynda, Aiagóz, Zyrian jáne Shemonaiha aýdandarynda jergilikti aýqymda tótenshe jaǵdai jariialandy. Apattyq qutqarý jáne kezek kúttirmeitin jumystardy jasaýǵa myńnan asa adam, 200 birlik tehnika, 96 motopompa jáne 10 qaiyq jumyldyrylǵan», - dedi Qalmuhanbet Qasymov.
Onyń aitýynsha, memlekettik materialdyq rezervten Shyǵys Qazaqstan oblysyna 8 tehnika jáne jyljymaly elektr stansysy berildi.
«Qazirgi tańda Qaraǵandy, Aqmola, Qostanai, Pavlodar jáne Soltústik Qazaqstan oblystarynda da jaǵdai kúrdeli. Osy óńirlerde, sonymen qatar Shyǵys Qazaqstan oblysynda aýa raiyna bailanysty eskertý jariialandy. Osyǵan orai jergilikti atqarýshy organdar kez kelgen ózgeriske jedel sharalar qabyldaýǵa daiyn bolýy kerek», - dedi ol.
Ministrdiń dereginshe, respýblika boiynsha barlyǵy 50 eldi mekende 1500-den asa úidi sý basty. 3800-den astam adam kóshirildi. Sýdyń tasý sebebi aýa raiynyń kúrt jylynyp, jaýyn-shashynnyń normadan 3 ese túsýi boldy. Qabyldanǵan sharalardyń arqasynda 1100-den asa úi sýdan bosatyldy. 2700-den astam adam úilerine qaityp oraldy.
