Ishki ister ministri Qalmuhanbet Qasymov BQO-da óz komandirin atyp óltirý jaǵdaiyna bailanysty istiń qalai bolǵanyn aityp berdi, dep habarlaidy QazAqparat tilshisi.
Eske sala ketsek, BQO Aqjaiyq aýdanynda politsiia qyzmetkeri óz komandirin atyp óltirgen bolatyn. BQO sotynyń baspasóz qyzmetinen túsken málimetke qaraǵanda, Aqjaiyq aýdandyq sotynyń tergeý sýdiasy Ámirhan Kýlikeshev tóraǵalyq etken sot otyrysynda 1994 jylǵy S. esimdi kúdiktini kúzetpen ustaý bultartpaý sharasy sanktsiialanǵan.
Búgin OKQ-da ótken baspasóz máslihatynda ministr Qalmuhanbet Qasymov osy jaǵdaiǵa bailanysty qandai sharalar qabyldanyp jatqanyn aityp berdi.
«Shynynda da, bizde sondai jaǵdai tirkeldi. Bul - saptyq bólimshe. Iaǵni, olar tergeý organdary nemese qylmystyq politsiia emes. Olar - kúzet jumysyn atqaratyn qyzmet. Olar Batys Qazaqstanda ákimdikti, sotty, meditsinalyq qoimalardy kúzetedi. Aita keterligi, biz qazirgi ýaqytta tergeý amaldaryn júrgizip, jaǵdaidy zerttep jatyrmyz. Qylmysty jasaǵan adam eki jyldan astam ýaqyt osy qyzmette bolǵan. Eki ret zertteýden ótken. Túsindirýinshe, oǵan eskertý jasalǵan. Osydan keiin ol ózin qorlandym dep eseptep, qylmysqa barǵan. Demek, qarýdy alǵannan keiin ol óz komandirine birneshe ret oq atqan. Qazirgi ýaqytta atap ótkenimdei, tergeý amaldary júrgizilýde. Mindetti túrde sot-meditsinalyq saraptamany júrgizemiz. Barlyq kináli adamdardy jaýapkershilikke tartamyz», - dedi ministr.
Qalmuhanbet Qasymov osy jyly elimizde dál osyndai eki jaǵdai tirkelgenin atap ótti.
«Taǵy bir oqiǵa Qaraǵandy oblysynda tirkeldi. Ózderińiz biletindei, jol-patrýldik qyzmetiniń inspektory qaraqshylyq jasamaq bolyp, tabeldik qarý alyp, bir kisimen qala shetine shyǵyp, óltirip, avtokóligine ie bolǵan. Jaqynda osy is boiynsha sot boldy. Ol 19 jylǵa bas bostandyǵynan aiyryldy. Biz qyzmettik tergeý jumystaryn júrgizip, 13 qyzmetkerdi jaýapkershilikke tarttyq. Olardyń segizi jumystan bosatyldy. Osyndai faktilerdiń barlyǵy boiynsha biz qyzmettik tergeý júrgizip, sharalardy qabyldaityn bolamyz», - dedi ministr.
