Qurmetti otandastar!
Barshańyzǵa belgili, Qazaqstan halqy 16 naýryzdan bastap tótenshe jaǵdai rejimine kóshti.
Árine, bul kezeń jurtshylyqqa ońai timegeni anyq.
Keibir azamattar jumysyn joǵaltyp, tabyssyz qaldy.
Oiǵa alǵan josparlaryn ózgertýge májbúr bolǵandar da bar.
Adami turǵydan men muny túsinemin.
Qaýipti virýs Qazaqstanda keń jaiylyp ketpeýi úshin osyndai kúrdeli, biraq asa qajet sheshim qabyldadym.
Sonyń arqasynda indet jappai taralǵan joq.
Dúniejúzilik densaýlyq saqtaý uiymy da, halyqaralyq sarapshylar da Qazaqstannyń is-qimylyn oń baǵalap otyr.
Elimizde qatań karantin sharalary engizilip, qoǵamdyq kóliktiń jumysy toqtatyldy.
Mekemeler men kásiporyndardyń basym bóligi qashyqtan jumys isteý rejimine kóshti.
Kósheler, turǵyn úiler dezinfektsiialanyp, naýqastarǵa dárigerlik kómek kórsetilýde.
Árine, barlyq oblystaǵy jaǵdai birdei emes.
Keibir aimaqtarda indet sharyqtaý sheginen ótken siiaqty.
Biraq birqatar óńirde virýstyń taralý qaýpi áli de seiilmei otyr.
Biz ondaǵy naqty sanitarlyq ahýalǵa qarai áreket jasaimyz.
Basty mindet – azamattarymyzdyń densaýlyǵyn saqtap, ómirin qorǵap qalý.
Áleýmettik jáne ekonomikalyq turaqtylyqty qamtamasyz etip, halyqtyń tabysyn saqtaý úshin de arnaiy sharalar qabyldanyp jatyr.
Taǵy da qaitalap aitamyn: qazirgidei kúrdeli kezde árbir azamat bizdiń nazarymyzda bolady. Memleket eshkimdi qiyndyqta qaldyrmaidy.
Men tótenshe jaǵdai kezeńinde azamattarymyzǵa qoldaý kórsetýge arnalǵan sharalardyń eki toptamasyn jariia ettim.
Bul sharalar barynsha júzege asyrylýda. Qoǵam tarapynan aitylǵan oryndy syn-pikirler de bar. Ony eskeremiz.
Búgingi kúni 4 million 250 myń azamatqa qarjylai kómek kórsetildi.
570 myńnan astam adamǵa azyq-túlik taratyldy.
Jalpy, 1,1 millionnan astam adamdy azyq-túlikpen qamtamasyz etýdi josparlap otyrmyz.
Elbasynyń bastamasymen qurylǵan «Birgemiz» qorynan qarjy bólindi.
«Nur Otan» partiiasy belsendi jumys atqarýda.
Sáýir-mamyr ailarynda 1,6 millionnan astam adamǵa kommýnaldyq tólem úshin kómek kórsetiledi.
Azyq-túliktiń jetkilikti bolýyna jáne onyń sapasyna qatysty udaiy monitoring júrgizilýde.
Elimizde azyq-túlik tapshylyǵy joq.
Jergilikti bilik organdary áleýmettik mańyzy bar taýarlar baǵasyn baqylaýda ustap otyr.
Biz indetpen kúrestiń aldyńǵy shebinde júrgen dárigerlerdi qarjylai qoldap jatyrmyz.
Densaýlyq saqtaý ministrligi jáne ákimder basqa da meditsina qyzmetkerlerine kómek kórsetý úshin sharalar qabyldaýda.
1,6 millionnan astam adam, 11,5 myń shaǵyn jáne orta biznes ókili nesielerin keiin tóleýge múmkindik aldy.
Bul jalpy alǵanda 360 milliardtan astam teńgeni qamtidy.
Búginde shaǵyn jáne orta biznes kúrdeli jaǵdaiǵa tap boldy.
Osy salaǵa qazir kómektespesek, ekonomikany qalpyna keltire almaimyz.
700 myńnan astam kompaniia men jeke kásipkerge salyqtyq jeńildikter jasaldy.
Sol arqyly olar 1 trillion teńgege jýyq qarjyny únemdei alady.
Shaǵyn jáne orta bizneske tiimdi nesie berý úshin qarajat bólindi.
Jumysshy sanyn jáne eńbekaqy kólemin azaitpaý maqsatynda iri kompaniialarǵa tiisti qoldaý kórsetiledi. Qazir olardyń tizimi jasalýda. Oǵan el ekonomikasy úshin asa mańyzdy kompaniialar ǵana engiziledi.
Aýyl sharýashylyǵy eńbekkerleri qiyndyqqa qaramastan jumys isteýde.
Sharýalardyń eńbegine dán rizamyz.
Kóktemgi egis naýqany máseleleri sheshimin tapty. Bul jumysqa eshqandai kedergi bolmaýy kerek. Aýyl sharýashylyǵy ministrligine jáne ákimderge osyndai mindet júkteledi.
Osy naýqanǵa jáne ónimdi aldyn ala satyp alýǵa 200 milliard teńge bólindi.
Sonyń 70 milliardy tuqym óndirisin damytýǵa, tyńaitqyshtar satyp alýǵa jumsalady.
Jalpy, azamattar men biznesti qoldaý úshin 6 trillion teńgege jýyq qarjy bólinip otyr.
Bul – qomaqty qarajat.
Úkimet pen quzyrly organdardyń mindeti – qarjynyń tiimdi jumsalýyn jáne osy úderistiń barynsha ashyq bolýyn qamtamasyz etý.
Qol jetkizgen nátijemen shektelýge bolmaidy. Qalyptasqan ahýal áli de kúrdeli.
Koronavirýs búkil álemdi jailap keledi.
Virýs juqtyrǵandardyń sany 3 millionǵa jýyqtady. Bul kórsetkish ósip bara jatyr.
Pandemiianyń ekinshi kezeńi bastalyp ketýi de yqtimal.
Qazaqstan indettiń sharyqtaý sheginen ótken joq. Ahýaldyń baqylaýdan shyǵyp ketý qaýpi bar.
Ókinishke qarai, keibir aimaqtarda, ásirese, Almatyda virýs juqtyrǵan dárigerler jáne meditsina qyzmetkerleri óte kóp.
Sondyqtan, solardyń qaýipsizdigin qamtamasyz etý úshin shuǵyl sharalar qabyldanýda.
Máseleniń anyq-qanyǵyn zerttep, buǵan jol bergen basshylardyń jaýapkershiligin qaraý kerek. Mundai jaǵdailarǵa jol bermeý qajet.
Qaýipsizdik sharalaryn qatań saqtaǵan jón. Onsyz bolmaidy.
Olai etpesek, indettiń jańa oshaqtary paida bolýy múmkin.
Koronavirýsqa jeńil-jelpi qaraýǵa bolmaidy. Karantin talaptarynan bir sátte bas tartsaq, dertti qaitadan órshitip alamyz.
Koronavirýs – adamnyń densaýlyǵyna qater tóndiretin óte juqpaly indet.
Muny búkil álem moiyndap otyr.
Al, ony joqqa shyǵaryp, jurtqa jalǵan aqparat taratýdyń arty jaqsylyqqa aparmaityny belgili.
Bul – azamattarymyzdyń densaýlyǵyna nuqsan keltiretin áreket.
Elimizdegi qazirgi ahýalǵa bailanysty jáne Memlekettik komissiianyń usynystaryn negizge alyp, men Tótenshe jaǵdai rejimin biylǵy 11 mamyrǵa deiin uzartý týraly Jarlyq shyǵarý jóninde sheshim qabyldadym.
Bul – biz bastan ótkerip jatqan kúrdeli kezeńniń talaby.
Zańǵa sáikes 11 mamyrda Tótenshe jaǵdai rejimi aiaqtalady.
Elimizdi pandemiianyń sheńgelinen qutqarý – bárimizge ortaq mindet. Men úshin ár azamattyń ómirinen qymbat eshteńe joq.
Sonymen qatar Tótenshe jaǵdai rejimin qamtamasyz etý jónindegi Memlekettik komissiia karantin talaptaryn jeńildetýge daiyn.
Aldymen, virýstyń taralýyn qatań baqylaýda ustap otyrǵan oblystar men qalalardan bastaýǵa bolady.
Memlekettik komissiiaǵa elordanyń úlgisimen elimizdiń barlyq aimaǵynda óz jumystaryna kirisetin mekemelerdiń tizimin jasaý tapsyryldy.
Birinshi kezekte ónerkásip kásiporyndary, qurylys, jol qurylysy jáne kólik kompaniialary, bankter jáne halyqqa qyzmet kórsetý ortalyqtary jumysqa kirisýi kerek.
Biraq barlyq sanitarlyq normalardy saqtap, jumys oryndarynda únemi dezinfektsiia júrgizip turý qajet. Kúndelikti ómirde áleýmettik ara qashyqtyqty ustanǵan jón.
Kásiporyn basshylaryna jáne jergilikti atqarý organdaryna jeke jaýapkershilik júkteledi. Bul oraida barlyq deńgeidegi ákimdikterdiń róli aitarlyqtai artady.
Úkimet kelesi aida da tabysynan aiyrylǵan azamattarǵa 42500 teńge kóleminde kómek beredi.
Qaitadan ótinim jiberýdiń qajeti joq. Tólem buryn usynylǵan qujat boiynsha júzege asyrylady.
Muqtaj otbasylar azyq-túlik ala beredi.
Oqshaýlaný kezinde ata-analarǵa kishkentai balalarymen tórt qabyrǵaǵa qamalyp otyrý ońai emes.
Memlekettik komissiia ákimdiktermen birlesip, aýlalardy jáne oiyn alańdaryn ashý máselesin oilastyrýǵa tiis. Árine, aldymen, barlyq sanitarlyq normalar men sanitarlyq qaýipsizdik talaptary qatań saqtalýy kerek.
Saiajai ieleri de qatty alańdap otyr. Óitkeni, qazir kóktemniń dál ortasy, jurtqa qolaily kezeń.
Memlekettik komissiia bul máseleni qarastyrdy, endi ony sheshý jolyn aitady.
Elimizde jolaýshylarǵa arnalǵan barlyq áýe tasymaly toqtady. Bul der kezinde qabyldanǵan durys sheshim boldy.
Degenmen, salystyrmaly túrde jaǵdaidyń turaqtanǵanyn eskerip, Úkimet 1 mamyrdan bastap Elorda men Almaty arasyndaǵy reisterdi ashatyn boldy.
Mundai shara azamattarmen qatar indetpen kúresip júrgen kóptegen mamandardyń jumysy úshin qajet.
Barlyq qaýipsizdik sharalaryn muqiiat oilastyryp, aviatsiialyq jáne sanitarlyq qyzmetterdiń ózara is-qimyl tártibin ázirleý mańyzdy.
Karantin rejimin birtindep jeńildetý degenimiz ózimiz úirengen kúndelikti tirshilikke qaita oralý emes ekenin uǵynǵanymyz jón.
Oiyn-saýyq jáne saýda ortalyqtary, kinoteatrlar, restorandar, saiabaqtar men adam kóp jinalatyn basqa da oryndar ázirge jabyq bolady. Joǵary oqý oryndary, kolledjder, mektepter qashyqtan oqytýdy jalǵastyra beredi.
El turǵyndaryn bul sharalarǵa túsinistikpen qaraýǵa shaqyramyn.
Halqymyzda «Tózim tilekke jetkizedi» degen maqal bar. Sondyqtan sabyr saqtaiyq.
Kúnniń jylynýy men karantinnen sharshaǵandyq jaýapsyzdyqqa sebep bolmaýǵa tiis. Karantin rejimi buzylsa, koronavirýsqa shaldyqqandardyń sany kúrt kóbeiip ketýi múmkin.
Ásirese, sozylmaly aýrýy bar jáne egde adamdar erekshe saq bolýy kerek.
Tipti, kishkentai balalar da aýrý juqtyrýy múmkin ekenin baiqadyq.
Sondyqtan olardyń densaýlyǵyna bei-jai qaraýǵa bolmaidy.
Ázirge bul virýstyń vaktsinasy joq.
Karantin sharalaryn qatań ustansaq qana indetten qutylamyz.
Asa qajettilik bolmasa, eshqaida shyqpai, úide otyryńyzdar.
Bul, ásirese, qazirgi qasietti Ramazan aiynda óte mańyzdy.
Osy kezeńniń de asyl muraty – shydam men tózim, sabyr men qanaǵat ekenin bilesizder.
Biyl Qazaqstan musylmandary dini basqarmasy Orazada birqatar rásimnen tartynýdy usyndy.
Sondyqtan osyndai ýaqytta aýyzashardyń ózin kópshilikpen birge ótkize almaitynymyz belgili.
Aldaǵy mamyr aiyndaǵy merekelerdi de úide atap ótýge týra keledi.
Biraq, Jeńis kúninde Uly Otan soǵysy ardagerleriniń birde-bireýi eleýsiz qalmaidy.
Bárine laiyqty qurmet kórsetiledi.
Ákimder soǵys jáne tyl ardagerlerine materialdyq kómek beredi.
Densaýlyq saqtaý ministrligi aýrýdy test arqyly anyqtaý jumysyn barynsha kúsheitýge tiis.
Ony halyqaralyq standartqa sáikes táýligine kem degende 20-25 myńǵa deiin jetkizý qajet.
Osyǵan orai, Úkimetke qysqa merzim ishinde otandyq test-júiesiniń óndirisin qolǵa alýdy tapsyramyn.
Biz immýnobiologiialyq preparattardy ázirleý úshin qolda bar múmkindikterimizdi tolyq paidalanýymyz kerek.
Vaktsina qoljetimdi bolǵan kezde Qazaqstan sheteldiń dári-dármegin kútip otyrmaýy qajet.
Daǵdarystan keiin de biz meditsinany damytýǵa basa mán beremiz.
Bul salaǵa memleket tarapynan aýqymdy qoldaý kórsetiledi.
Úkimet Halyq densaýlyǵy jáne densaýlyq saqtaý júiesi týraly jańa kodeks jobasyna osy salany jetildiretin naqty usynystar engizýge tiis.
Parlament bul kodeksti sessiianyń sońyna deiin qabyldaidy dep oilaimyn.
Biz qazirden bastap daǵdarystan keiingi kezeńge daiyndalýymyz kerek.
Bul jóninde Elbasy Qaýipsizdik Keńesiniń 24 sáýirde ótken otyrysynda naqty aitty.
Úkimet pen Ulttyq bank 11 mamyrǵa deiin Ekonomikalyq damýdy qalpyna keltirý jónindegi keshendi jospardy daiyndaidy.
Onda daǵdarystan zardap shekken salalarǵa qoldaý kórsetý sharalary qamtylady.
Búginde elimiz damýdyń jańa deńgeiine qadam basyp otyr.
Shyn máninde, biz endi múlde jańa jaǵdaida ómir súretin bolamyz.
Sondyqtan ekonomikaǵa jáne memlekettik basqarý júiesine aýqymdy ári mańyzdy ózgerister qajet.
Indetpen kúrestiń aldyńǵy shebindegi azamattardy taǵy da erekshe atap ótkim keledi.
Halyqtyń qaýipsizdigi úshin jankeshtilik tanytyp júrgen dárigerler men meditsina qyzmetkerlerine, quqyq qorǵaý organdarynyń ókilderine jáne áskeri qyzmetshilerge alǵys aitamyn.
Qaýip-qaterge qaramai muqtaj jandarǵa kómek qolyn sozǵan volonterlerge de rizashylyq bildiremin.
Sondai-aq, halyqqa jedel jáne shynaiy aqparat taratyp júrgen jýrnalister qaýymyna alǵys aitamyn.
Daǵdarysqa qarsy sharalardy júzege asyrýǵa atsalysqan memlekettik apparattyń qyzmetkerleri de qurmetke laiyq.
Qazaqstan halyqaralyq qoǵamdastyqtan esh nárseni jasyrmai, barlyq málimetti ashyq jariialap otyr.
Sondyqtan keibir azamattardy bos sóz ben jalǵan málimetke jol bermeýge shaqyramyn.
Árine, memlekettik organdardyń jumysynda olqylyqtar bar, biraq, memlekettik qyzmetshilerdiń kópshiligi jumysyn adal atqarýda.
Kemshilikterdi biz kórip otyrmyz. Odan tiisti sabaq alyp, qajetti sharalardy qabyldaimyz.
Bul daǵdarys birligi bekem, elin súietin otanshyl jurt ekenimizdi kórsetti.
Qashanda osylai ult bolyp uiysa bilsek, barlyq maqsatymyzǵa qol jetkizemiz. Oǵan eshqandai kúmán joq.
Eldiń qamy úshin bastaǵan isimiz qaiyrly bolady dep senemin!
Halqymyz «Bereke basy – birlikte» deidi.
Judyryqtai jumylsaq, kez kelgen qiyndyqty jeńemiz!
Biz birgemiz!
