QR Prezidenti Qasym-Jomart Toqaevtyń alǵysózimen buqaralyq aqparat quraldary mamandaryna arnalǵan «Sóztúzer» sózdigi jaryq kórdi. Memleket basshysynyń sózdikke jazǵan alǵysózin QR Prezidenti Ákimshiligi basshysynyń birinshi orynbasary Dáýren Abaev Ortalyq kommýnikatsiialar qyzmetindegi kitaptyń tusaýkeser rásiminde oqyp berdi, dep habarlaidy QazAqparat .
«Til - ulttyń ózegi. Onda halqymyzdyń búkil bitim-bolmysy kórinis tapqan. Bai ári shuraily tilimiz urpaqtan urpaqqa jalǵasyp, elimizben birge jasap keledi. Shyn máninde til - jandy aǵza ispetti, udaiy jańaryp otyrady. Zaman talabyna sai jańa sózder qosylady. Keibiri kónerip, sirek qoldanyla bastaidy. Bul - zańdy qubylys. Biz úshin eń bastysy - qasterli tilimizdiń ǵasyrlar boiy qalyptasyp, ýaqyt synynan súrinbei ótken tabiǵatyn buzbai odan ári damyta túsý. Saýatty jazyp, durys sóilei biletin halyqtyń tili ǵumyry bolady. Sondai-aq kez kelgen salada emin-erkin qoldanylady. Táýelsizdik jyldarynda ana tilimizdiń órisi keńeie tústi. Bilim men ǵylymnyń, internet pen biznestiń tiline ainaldy», - dep atap ótedi Memleket basshysy.
Degenmen, Qasym-Jomart Toqaev aqparattyq tehnologiialardyń zardabyn tigizetin tustary da joq emes ekendigin basa aitady.
«Qazirgi jastar ádebi shyǵarma oqyǵannan góri til mádenietiniń talaptary saqtala bermeitin áleýmettik jelide otyrǵandy jón kóredi. Bul óskeleń urpaqtyń durys jazyp, sóilei bilý qabiletine keri áserin tigizýde. Til tazalyǵyn saqtaý isinde buqaralyq aqparat quraldary erekshe ról atqarady. Jurttyń bári maman emes. Jýrnalister qai sózdi nemese termindi qalai qoldanysa kópshilik solai kerek dep qabyldaityndyǵy jasyryn emes. Sondyqtan media salasy qyzmetkerleriniń sóz ónerin jetik meńgerýi asa mańyzdy», - dedi QR Prezidenti.
Memleket basshysy ókinishke qarai, aqparat quraldarynda sózder men tirkesterdi orynsyz nemese qate qoldaný faktileri jii kezdesetindigine nazar aýdartady.
«Bul kemshilikti der kezinde túzetý mańyzdy mindet. Osyǵan orai arnaiy sózdik jasalyp, kópshilikke usynylyp otyr. Munda sózderdi qate qoldaýdyń 2 myńnan astam naqty mysaly jinaqtalǵan. Onyń bári aqparat quraldarynan ózimiz kúndelikti kórip júrgen mysaldar. Sózdikte qate qoldanystardyń týyndaý sebebi aiqyndalyp, durys nusqasy kórsetilgen. Bul eńbektiń ereksheligi men praktikalyq qundylyǵy osynda. Osy sózdikti daiyndaǵan bilikti mamandarǵa rizashylyǵymdy bildiremin. «Sóztúzer» BAQ salasy mamandarynyń ǵana emes qalyń kópshiliktiń igiligine jaraidy dep senemin», - dedi Qasym-Jomart Toqaev.
