قر پرەزيدەنتٸ قاسىم-جومارت توقاەۆتىڭ العىسٶزٸمەن بۇقارالىق اقپارات قۇرالدارى ماماندارىنا ارنالعان «سٶزتٷزەر» سٶزدٸگٸ جارىق كٶردٸ. مەملەكەت باسشىسىنىڭ سٶزدٸككە جازعان العىسٶزٸن قر پرەزيدەنتٸ ەكٸمشٸلٸگٸ باسشىسىنىڭ بٸرٸنشٸ ورىنباسارى دەۋرەن اباەۆ ورتالىق كوممۋنيكاتسييالار قىزمەتٸندەگٸ كٸتاپتىڭ تۇساۋكەسەر رەسٸمٸندە وقىپ بەردٸ, دەپ حابارلايدى قازاقپارات .
«تٸل - ۇلتتىڭ ٶزەگٸ. وندا حالقىمىزدىڭ بٷكٸل بٸتٸم-بولمىسى كٶرٸنٸس تاپقان. باي ەرٸ شۇرايلى تٸلٸمٸز ۇرپاقتان ۇرپاققا جالعاسىپ, ەلٸمٸزبەن بٸرگە جاساپ كەلەدٸ. شىن مەنٸندە تٸل - جاندى اعزا ٸسپەتتٸ, ۇدايى جاڭارىپ وتىرادى. زامان تالابىنا ساي جاڭا سٶزدەر قوسىلادى. كەيبٸرٸ كٶنەرٸپ, سيرەك قولدانىلا باستايدى. بۇل - زاڭدى قۇبىلىس. بٸز ٷشٸن ەڭ باستىسى - قاستەرلٸ تٸلٸمٸزدٸڭ عاسىرلار بويى قالىپتاسىپ, ۋاقىت سىنىنان سٷرٸنبەي ٶتكەن تابيعاتىن بۇزباي ودان ەرٸ دامىتا تٷسۋ. ساۋاتتى جازىپ, دۇرىس سٶيلەي بٸلەتٸن حالىقتىڭ تٸلٸ عۇمىرى بولادى. سونداي-اق كەز كەلگەن سالادا ەمٸن-ەركٸن قولدانىلادى. تەۋەلسٸزدٸك جىلدارىندا انا تٸلٸمٸزدٸڭ ٶرٸسٸ كەڭەيە تٷستٸ. بٸلٸم مەن عىلىمنىڭ, ينتەرنەت پەن بيزنەستٸڭ تٸلٸنە اينالدى», - دەپ اتاپ ٶتەدٸ مەملەكەت باسشىسى.
دەگەنمەن, قاسىم-جومارت توقاەۆ اقپاراتتىق تەحنولوگييالاردىڭ زاردابىن تيگٸزەتٸن تۇستارى دا جوق ەمەس ەكەندٸگٸن باسا ايتادى.
«قازٸرگٸ جاستار ەدەبي شىعارما وقىعاننان گٶرٸ تٸل مەدەنيەتٸنٸڭ تالاپتارى ساقتالا بەرمەيتٸن ەلەۋمەتتٸك جەلٸدە وتىرعاندى جٶن كٶرەدٸ. بۇل ٶسكەلەڭ ۇرپاقتىڭ دۇرىس جازىپ, سٶيلەي بٸلۋ قابٸلەتٸنە كەرٸ ەسەرٸن تيگٸزۋدە. تٸل تازالىعىن ساقتاۋ ٸسٸندە بۇقارالىق اقپارات قۇرالدارى ەرەكشە رٶل اتقارادى. جۇرتتىڭ بەرٸ مامان ەمەس. جۋرناليستەر قاي سٶزدٸ نەمەسە تەرميندٸ قالاي قولدانىسا كٶپشٸلٸك سولاي كەرەك دەپ قابىلدايتىندىعى جاسىرىن ەمەس. سوندىقتان مەديا سالاسى قىزمەتكەرلەرٸنٸڭ سٶز ٶنەرٸن جەتٸك مەڭگەرۋٸ اسا ماڭىزدى», - دەدٸ قر پرەزيدەنتٸ.
مەملەكەت باسشىسى ٶكٸنٸشكە قاراي, اقپارات قۇرالدارىندا سٶزدەر مەن تٸركەستەردٸ ورىنسىز نەمەسە قاتە قولدانۋ فاكتٸلەرٸ جيٸ كەزدەسەتٸندٸگٸنە نازار اۋدارتادى.
«بۇل كەمشٸلٸكتٸ دەر كەزٸندە تٷزەتۋ ماڭىزدى مٸندەت. وسىعان وراي ارنايى سٶزدٸك جاسالىپ, كٶپشٸلٸككە ۇسىنىلىپ وتىر. مۇندا سٶزدەردٸ قاتە قولداۋدىڭ 2 مىڭنان استام ناقتى مىسالى جيناقتالعان. ونىڭ بەرٸ اقپارات قۇرالدارىنان ٶزٸمٸز كٷندەلٸكتٸ كٶرٸپ جٷرگەن مىسالدار. سٶزدٸكتە قاتە قولدانىستاردىڭ تۋىنداۋ سەبەبٸ ايقىندالىپ, دۇرىس نۇسقاسى كٶرسەتٸلگەن. بۇل ەڭبەكتٸڭ ەرەكشەلٸگٸ مەن پراكتيكالىق قۇندىلىعى وسىندا. وسى سٶزدٸكتٸ دايىنداعان بٸلٸكتٸ ماماندارعا ريزاشىلىعىمدى بٸلدٸرەمٸن. «سٶزتٷزەر» باق سالاسى ماماندارىنىڭ عانا ەمەس قالىڭ كٶپشٸلٸكتٸڭ يگٸلٸگٸنە جارايدى دەپ سەنەمٸن», - دەدٸ قاسىم-جومارت توقاەۆ.
