TASS agenttigi bas direktorynyń birinshi orynbasary Mihail Gýsman «Eho Moskvy» radiosynyń efirinde osydan bir jyl buryn Qazaqstan Prezidenti Qasym-Jomart Toqaevtan qalai suhbat alǵanyn aityp berdi, dep habarlaidy QazAqparat.
«Qazaqstan Prezidentimen suhbattasý baqyty buiyrdy. Bul ótken jyly bolǵan edi. Biraq, pandemiianyń órship turýyna bailanysty suhbat onlain rejimde ótti. Biz ZOOM arqyly áńgimelestik. Suhbat Jeńistiń 75 jyldyǵy merekesin atap ótý qarsańynda órbidi. Áńgime barysynda erekshe áserge bólendim. Óitkeni, suhbat óte qyzyqty ǵana bolyp qoimai, menińshe, senim aiasynda órbigendei. Qazaqstan Prezidenti maidanger bolǵan, soǵystyń qiyn-qystaý jolynan ótken, urys dalasynda jaralanyp, jaýyngerlik nagradalar alǵan ákesin eske aldy. Toqaevtar otbasynyń tarihy óte kúrdeli, óte qiyn epizodtarǵa toly. Sebebi otbasynda qaiǵyly sátter de bolǵan. Tipti munyń atasymen, ákesiniń taǵdyrymen bailanysty ekendigin aitýdyń ózi aýyr. Onyń ákesi tamasha adam, maidanger ǵana emes, sonymen birge kórnekti qalamger bolǵan. Ony qazaq ádebietindegi detektiv janrynyń negizin qalaýshy dep te aitady. Ol birneshe kitap jazǵan. Meniń tarazylaýymsha, Qazaqstan Prezidenti Qasym-Jomart Toqaev úshin ákesi - myqtylyqtyń, maqsatqa umtylýdyń, qaisarlyqtyń úlgisi. Túsinýimshe, Qasym-Jomart Toqaev búkil ómir boiy odan úlgi alýǵa tyrysyp keledi», - dedi Mihail Gýsman.
Sonymen qatar ol shveitsariialyq saiasattaný ǵylymynyń doktory Deniel Ýornerdiń «Qasym-Jomart Toqaev syryn jeńil-jelpi asha salatyn adam emes» degen pikirine qatysty oiyn bildirdi.
«Adamdarǵa shamadan tys kóńil-kúidi bildirmeý, adamdarǵa qandai jaǵdai bolsa da tym ashyla bermeý - bul jaqsy diplomat úshin kásibi sapa desek te bolady. Muny kásibi erekshelik, tipti diplomatqa qoiylatyn talap der edim. Ekinshi qyrynan qaraǵanda ol ázilge beiim adam (...)», - dedi Mihail Gýsman.
Esterińizge sala ketsek, ótken jyldyń mamyrynda Qazaqstan Prezidenti Qasym-Jomart Toqaev TASS agenttigi bas direktorynyń birinshi orynbasary Mihail Gýsmanǵa ekskliýzivti suhbat bergen bolatyn.
