Foto: Aqorda
Búgin Memleket basshysy Qasym-Jomart Toqaevtyń tóraǵalyǵymen jasandy intellektini (JI) damytý máselelerine arnalǵan keńes ótti. Jiynǵa Premer-ministr Oljas Bektenov, Prezident Ákimshiliginiń basshysy Aibek Dádebai, Úkimet músheleri men ortalyq memlekettik organdardyń basshylary qatysty, dep habarlaidy Ult.kz.
Prezident JI-diń jahandyq tehnologiialyq ózgeristerdiń basty qozǵaýshy kúshine ainalǵanyn atap ótip, bul salada Qazaqstannyń aiqyn jáne batyl qadamdar jasaýy qajet ekenin aitty.
— Jasandy intellekt qazir barlyq eldiń damý qarqynyna tikelei áser etedi. Onsyz jahandyq básekede alǵa shyǵý múmkin emes. UNCTAD boljamy boiynsha, 2033 jylǵa qarai JI naryǵy 4,8 trillion dollarǵa jetedi. Bul – bizdiń elimiz úshin jańa múmkindikter kezeńi, — dedi Memleket basshysy.
Qasym-Jomart Toqaev AQSh pen Qytaidyń bul baǵyttaǵy strategiialyq bastamalaryn atap ótip, Qazaqstannyń da Eýraziiadaǵy tsifrlyq habqa ainalýyn maqsat etýi kerek ekenin jetkizdi. Ol biryńǵai ulttyq tsifrlyq ekojúie qurý isin jedeldetý, zańnamalyq jáne infraqurylymdyq negiz daiyndaý, málimetterdi jinaý júiesin jetildirý mindetterin qaita eske saldy.
Prezident JI-diń eldiń innovatsiialyq damýy men tsifrlyq derbestigi úshin strategiialyq rólin atap, Úkimetke Strategiialyq josparlaý agenttigimen birlesip jasandy intellektini damytý jáne tsifrlyq transformatsiiaǵa arnalǵan keshendi baǵdarlama ázirleýdi tapsyrdy. Bul qujatqa halyqaralyq sarapshylardy tartý josparlanyp otyr.
Keńes barysynda Memleket basshysy memlekettiń tsifrlyq saiasatyna arqaý bolatyn toǵyz basym baǵytty belgiledi. Sonyń ishinde JI-di ekonomikanyń naqty sektoryna engizý, iri kásiporyndarmen seriktestik ornatý jáne jyl sońyna deiin óndiristik úderisterde JI qoldanýdyń naqty tiimdi úlgilerin usyný qajettigin erekshe atap ótti.
Onyń aitýynsha, Qazaqstan aldaǵy bes jylda tolyqqandy tsifrlyq memleketke ainalýy tiis.
