Memleket basshysy Qasym-Jomart Toqaev Arystaǵy jaǵdaiǵa bailanysty qurylǵan jedel shtabtyń otyrysyn ótkizdi. Bul jaiynda QR Prezidentiniń baspasóz hatshysy Berik Ýáli Facebook-taǵy paraqshasynda jazdy, dep habarlaidy QazAqparat tilshisi.
«Qazaqstan Prezidenti Arys qalasyndaǵy jaǵdaimen tanysý úshin Túrkistan oblysyna keldi. Memleket basshysy qarý-jaraq qoimasyndaǵy jarylystardyń zardaptaryn qalpyna keltirý jónindegi jedel shtabtyń otyrysyn ótkizdi. Oblys basshysy Ómirzaq Shókeev Prezident Qasym-Jomart Toqaevqa oqiǵa ornyndaǵy jaǵdai men atqarylyp jatqan is-sharalar týraly baiandady. Memleket basshysy eń aldymen qaitys bolǵan azamattyń jaqyndary men týystaryna kóńil aitty», - dep atap ótedi Berik Ýáli.
Onyń atap ótýinshe, Prezident baspanasyz qalǵan azamattardy jedel ornalastyrýdy qamtamasyz etý úshin shuǵyl sharalar qabyldap, zardap shekkenderge qajetti jan-jaqty kómek, sonyń ishinde meditsinalyq járdem kórsetýdi tapsyrdy.
Memleket basshysy memlekettik materialdyq qordyń esebinen qalanyń qalypty tirshiligin qamtamasyz etý úshin qajetti taýarlar men materialdyq qundylyqtardy berýdi tapsyrdy. «Úkimet pen oblys ákimdigin qalpyna keltirý jumystarynyń qunyn eseptep shyǵarýdy jáne turǵyn úilerdi, injenerlik jelilerdi, áleýmettik jáne basqa da infraqurylymdy qalpyna keltirý úshin Úkimettiń qorynan qajetti qarajattyń bólinýin qamtamasyz etýdi tapsyrdy. Qasym-Jomart Toqaev oqiǵa ornynda qutqarý jáne qalpyna keltirý jumystary barysynda vedomstvoaralyq ózara júieli is-qimyldy uiymdastyrýdy, sondai-aq, jarylystardyń sebepterin muqiiat zertteýdi talap etti», - dedi ol.
