Foto: akorda.kz
Qasym-Jomart Toqaev To Lamǵa Vetnam Sotsialistik Respýblikasynyń Prezidenti bolyp sailanýyna orai quttyqtaý jedelhatyn joldady, dep habarlaidy Aqordanyń baspasóz qyzmeti.
Memleket basshysy Vetnam Prezidentiniń aldaǵy barlyq bastamasyna tabys, al dostas vetnam halqyna baq-bereke tiledi.
«Siz osy laýazymda qyzmet etken kezeńde ǵajap elińiz odan ári gúldenip, úilesimdi jáne ornyqty qoǵam qurý jolynda turaqty dami beretinine senimdimin. Qazaqstan men Vetnamdy ózara senim men ortaq múddege negizdelgen tyǵyz qarym-qatynastar bailanystyrady. Elderimizdiń múddesi jolyndaǵy kópqyrly yqpaldastyqty órkendetý úshin jańa múmkindikterdi Sizben birlesip paidalanýǵa daiynmyn», – dep jazylǵan jedelhatta.
Osyǵan deiin Vetnamnyń Ulttyq jinalysy (bir palataly parlament) sársenbi kúni Vetnam Kommýnistik partiiasy Ortalyq Komiteti Saiasi biýrosynyń múshesi To Lamdy eldiń jańa prezidenti etip sailanǵanyn jazǵan edik.
