Jańa Qazaqstannyń negizin qalap, irgesin keńeitýge búkil halyq jumyldy. Bul týraly Táýelsizdiktiń 30 jyldyǵyna arnalǵan saltanatty is-sharada QR Prezidenti Qasym-Jomart Toqaev aitty, dep habarlaidy QazAqparat.
«Biz jańa Qazaqstannyń negizin qalap, irgesin keńeitýge búkil halyq bolyp jumyldyq. Elimizdiń ósip-órkendeýine árbir otandasymyz óz úlesin qosty. Barlyq jetistigimiz – túrli kásip ieleriniń eren eńbeginiń jemisi. Ustazdarymyz urpaqqa sapaly bilim, sanaly tárbie berip, jańa beleske jol ashty. Dárigerlerimiz ult saýlyǵy úshin barlyq kúsh-jigerin salyp eńbek etti. Ásirese pandemiia kezinde adam ómirine arasha túsip, indetpen aianbai kúresti», - dep atap ótti QR Prezidenti.
Memleket basshysy áskeri qyzmetshiler el shebin qas qaqpai kúzetsa, tártip saqshylary tynyshtyǵymyzdy, qaýipsizdigimizdi qorǵaǵanyn aitty.
«Tótenshe jaǵdai qyzmetkerleri qaterden qaimyqpai, talai jandy aman saqtap qaldy. Ziialy qaýym mádenietimizdi baiytyp, ǵylymi áleýetimizdi arttyrdy. Memlekettik qyzmetshiler halyqqa qyzmet etip, eldigimizdiń tuǵyryn bekite tústi. Qurylysshylar milliondaǵan sharshy metr úi, myńdaǵan shaqyrym jol salyp, órisimizdi keńeitti. Diqandar dán egip, shopandar tórt túligin órgizip, yrysymyzdy kóbeitti. Munaishylar qara altyn óndirip, qazynamyzdy baiytty. Kenshiler jer qoinaýyn igerip, igiligimizdi eseledi. Ónerpazdar álemdi moiyndatyp, Táýelsiz Qazaqstandy jer júzine tanytty. Sportshylar dúbirli dodalarda týymyzdy jelbiretip, ánuranymyzdy áýeletti. Kásipkerler óndiris oryndaryn ashyp, jurtty jumysqa tartty»,- dedi Qasym-Jomart Toqaev.
QR Prezidenti eńseli el bolýymyzǵa barlyq salanyń túrli mamandyq ókilderi jáne barsha azamattarymyz bir kisidei atsalysqanyn basa aitty.
«Túptep kelgende táýelsizdikti nyǵaitý degenimiz - elge paidasy tietin naqty jumystardy júzege asyrý. Qazaqstan sizderdiń jasampaz eńbekterińizdiń arqasynda zor jetistikke jetti. Men osy mereili sátte Táýelsizdigimizdi nyǵaitýǵa qosqan úlesi úshin dúiim jurtqa alǵys aitamyn!» - dedi Memleket basshysy.
