Memleket basshysy Qasym-Jomart Toqaev Nur-Sultan qalasyna jumys saparymen kelgen Resei Federatsiiasynyń Syrtqy ister ministri Sergei Lavrovty qabyldady, dep habarlaidy "Ult aqparat" Aqordaǵa silteme jasap.
Qasym-Jomart Toqaev memleketter arasyndaǵy ózara qarym-qatynastar men yntymaqtastyqqa tyń serpin berý turǵysynan ministrdiń bul saparynyń mańyzdy ekenin aitty.
– Qazaqstan men Resei – odaqtas ári strategiialyq seriktester. Yntymaqtastyǵymyzdyń kún tártibi óte tyǵyz jáne qol jetkizgen ýaǵdalastyqtardy júzege asyrý úshin kóp jumys atqarýdy qajet etedi. Sondyqtan sizdiń saparyńyz barysynda jáne vedomstvo basshylary deńgeiindegi, sondai-aq, eń joǵary deńgeidegi kezdesýler barysynda alǵa qoiǵan maqsattarymyzǵa qol jetkizemiz dep oilaimyn. 23 naýryzda Vladimir Pýtinmen óńiraralyq kezdesý ótkizýdiń mańyzdylyǵy týraly sóilestik. Ókinishke qarai, pandemiia saldarynan keiinge shegerildi. Biz kez kelgen formatta, múmkindiginshe betpe-bet kezdesýge ýaǵdalastyq. Eger munyń sáti túspese, onda atalǵan kezdesýdi video-konferentsiia rejiminde mindetti túrde ótkizemiz. Óitkeni bul asa mańyzdy, – dedi Memleket basshysy.
Qasym-Jomart Toqaev Qazaqstanǵa vaktsinanyń qosymsha bóligin jiberý máselesine qoldaý kórsetkeni úshin Vladimir Pýtinge rizashylyǵyn bildirdi.
– Biz pandemiiaǵa qarsy birlesken kúreste túsinistik tanytyp, kómek kórsetkeni úshin Resei basshylyǵyna, Resei Federatsiiasynyń Prezidentine rizashylyǵymyzdy bildiremiz. 23 naýryzda sóilesken kezde Reseiden qosymsha 4 million mólsherde vaktsina alý jóninde másele kóterdim. Meniń ótinishimdi túsinistikpen qabyldady. Buǵan deiin biz Qaraǵandy fabrikasynda birlesip vaktsina óndirýge ýaǵdalasqan edik. Qazir óndiris jolǵa qoiyldy. Jaqynda ǵana men ózim de Qazaqstanda óndirilgen «Spýtnik V» vaktsinasyn saldyrdym. Jýyrda Úkimettiń keńesin ótkizip, halyqty jappai vaktsinalaýdy jedeldetýdi tapsyrdym. Bul mindet, birinshiden, naryqqa vaktsinany tiisti mólsherde jetkizýge, ekinshiden, halyqqa vaktsina salýdyń mańyzdylyǵyn túsindirý jumystaryn júrgizýge bailanysty. Qazir jurttyń kópshiligi bul sharanyń mańyzdylyǵyn tolyq túsinbei jatyr. Árine, biz vaktsinany tegin salamyz. Sondyqtan men ózim de vaktsina egýden basqa jol joq ekenin únemi aityp kelemin, – dedi Memleket basshysy.
Óz kezeginde Sergei Lavrov Prezident Vladimir Pýtinniń sálemi men iltipatyn jetkizip, Resei tarapy vaktsina jetkizý máselesin sheshetinin aitty.
Kezdesý barysynda ekijaqty yntymaqtastyqtyń negizgi aspektileri, onyń ishinde, saýda-ekonomikalyq jáne mádeni-gýmanitarlyq bailanystar, ǵarysh salasyndaǵy ózara is-qimyldy odan ári damytý máseleleri talqylandy.
– Kelesi aida video konferentsiia formatynda Joǵary eýraziialyq ekonomikalyq keńestiń otyrysyn uiymdastyrý josparlanyp otyr. Bul bizdiń koronovirýs indetinen keiingi kezeńdegi yntymaqtastyǵymyzdy jalǵastyrýǵa baǵyttalǵan ortaq kúsh-jigerimizdi jumyldyrý jolyndaǵy mańyzdy kezeń. Ózińiz atap ótkendei, biz Prezidentterdiń qatysýymen ótetin 17-aimaqaralyq forýmdy ótkizemiz. Biraq onyń qandai formatta bolatyny epidemiologiialyq jaǵdaiǵa bailanysty. Bizdiń qarym-qatynastarymyz óte jaqsy. Saýda-ekonomikalyq yntymaqtastyq máseleleri boiynsha premer-ministrler eki ret kezdesti, vitse-premerler odan da jii bailanys jasap turady. Qarym-qatynastar pandemiia kezinde de úzilgen joq. Iu.Gagarinniń ǵaryshqa ushqanyna 60 jyl tolýyn atap ótemiz. Bul – bizdiń ǵaryshty beibit igerýge qosqan ortaq úlesimiz. Baiqońyrdaǵy bizdiń ózara is-qimylymyzdy odan ári órkendetý jáne Qazaqstannyń ǵaryshtyq áleýetin damytý jónindegi birlesken jumystarymyz qarqyndy júrip jatyr, – dedi Sergei Lavrov.
