Qasym-Jomart Toqaevtyń prezidenttiginiń 2 jylynda Qazaqstannyń syrtqy saiasi qyzmeti memlekettiń odan ári damýy men órkendeýi úshin mańyzdy mánge ie aitýly oqiǵalarǵa toly boldy.
Bul pikirdi Prezidenti janyndaǵy Qazaqstannyń strategiialyq zertteýler institýty halyqaralyq zertteýler bóliminiń basshysy Ásel Nazarbetova aitty, dep habarlaidy QazAqparat.
«Álemdik saiasattyń qazirgi úrdisterine sáikes eldiń syrtqy saiasi baǵytyna jańa baǵyt engizý qajettigi ósýde, bul aldaǵy ýaqytta da Qazaqstannyń halyqaralyq arenadaǵy dáiekti jáne boljamdy áriptes retindegi bedelin nyǵaitýǵa yqpal etetin bolady. Memleket basshysy ulyqtaý rásiminde sóilegen sózinde bul messedjdi taǵy da atap ótti: «Biz ulttyq múddelerdi álemdik arenada nyq ilgeriletetin bolamyz. Eldiń syrtqy saiasi qyzmeti elge, ulttyq bizneske jáne árbir azamatqa naqty paida ákeletin bolady». Bul qaǵidattardy negizge ala otyryp, Memleket basshysy 2020 jylǵy naýryzda qol qoiǵan Qazaqstannyń 2020-2030 jyldarǵa arnalǵan syrtqy saiasatynyń Tujyrymdamasy ázirlendi. Strategiialyq qujat Tuńǵysh Prezident – Elbasy N.Á. Nazarbaevtyń syrtqy saiasi baǵytynyń sabaqtastyǵy, sondai-aq kóp vektorly, pragmatizm jáne belsendilik qaǵidattary negizinde eldiń syrtqy saiasatyn iske asyrýdy reglamentteidi», - deidi Ásel Nazarbetova.
Sarapshynyń aitýynsha, Prezidenttiktiń alǵashqy kúnderinen bastap Q.K. Toqaev Qazaqstannyń strategiialyq seriktesterimen, onyń ishinde Resei Federatsiiasy, Qytai Halyq Respýblikasy, Amerika Qurama Shtattary, Eýropalyq Odaq, Ortalyq Aziia memleketterimen ózara tiimdi yntymaqtastyqty nyǵaitýǵa belsendi yqpal etýde.
Prezidenttiń 2019 jylǵy 3-4 sáýirde Resei Federatsiiasyna, 2019 jylǵy 14 sáýirde – Ózbekstan Respýblikasyna, 2019 jylǵy 11-12 qyrkúiekte – Qytai Halyq Respýblikasyna, 2019 jylǵy 27-28 qarashada – Qyrǵyzstanǵa, 2019 jylǵy 5-6 jeltoqsanda – Germaniia Federativtik Respýblikasyna, 2020 jylǵy 27-28 qańtarda – Birikken Arab Ámirlikterinde resmi jáne memlekettik saparlary simvoldyq sipatqa ie boldy, olardyń sheńberinde ekijaqty ózara is-qimyldy keńeitý qujattaryna qol qoiyldy.
«Q.K.Toqaevtyń prezidenttigi kezindegi mańyzdy syrtqy saiasi oqiǵalar arasynan 2019 jyldyń 24 qyrkúiegindegi Niý-Iorkte (AQSh) ótken BUU Bas Assambleiasynyń 74-sessiiasynyń Jalpy debattaryn erekshe atap ótken jón. Memleket basshysy retinde sóilegen sózinde Qasym-Jomart Toqaev iadrolyq qarýdan azat álem qurý týraly Jalpyǵa birdei deklaratsiiany ilgeriletý qajettigin, iadrolyq qarýdan azat aimaqtar arasyndaǵy yntymaqtastyqty keńeitýge jáne osyndai aimaqtardy qurýǵa degen umtylysymyzdy, AÓSShK-ti qaýipsizdik pen damý jónindegi tolyqqandy óńirlik uiymǵa ainaldyrýdyń ózektiligin atap ótti, sondai-aq Ortalyq Aziia elderi men Aýǵanstanǵa járdem kórsetý mandatymen Almatyda BUU-nyń TMD jónindegi ortalyǵyn qurý týraly usynys jasady. Sonymen birge Q.K. Toqaev 2020 jylǵy 15 aqpanda qaýipsizdik jónindegi Miýnhendegi bedeldi konferentsiiaǵa qatysyp, Ortalyq Aziianyń jahandyq geosaiasattaǵy róline, Qazaqstannyń syrtqy saiasi basymdyqtaryna, óńirlik qaýipsizdik problemalaryna nazar aýdardy», - deidi Á. Nazarbetova.
Koronavirýs pandemiiasyna bailanysty álem aýqymdy daǵdarysqa tap boldy. Qazirgi ýaqytta barlyq elder sanitarlyq daǵdarystyń álemdik qoǵamdastyqqa teris áserine alańdaýly, memleketterdiń kúsh-jigeri epidemiologiialyq jáne ekonomikalyq qaýipsizdikti qamtamasyz etýge baǵyttalǵan. Bul jaǵdaida álem memleketteri, halyqaralyq institýttar men uiymdar tyǵyz yntymaqtastyqta jumys istep, COVID-19 taralýyna qarsy kúsh biriktirip, bir-birine gýmanitarlyq kómek kórsetýde. Sondai-aq Qazaqstan qyrǵyz azamattaryn koronavirýstyń taralý oshaqtarynan otanyna qaitarý kezinde kómek kórsetip, qazaq-qyrǵyz shekarasy arqyly júkterdiń tranzitine járdem berdi. Qyrǵyzstan men Tájikstanǵa 5 myń tonna un túrinde gýmanitarlyq kómek kórsetildi.
«Kúsh-jigerdi úilestirý aiasynda Memleket basshysy túrli halyqaralyq alańdar jumysyna belsendi qatysýda, olardyń maqsaty «kovidtan keiingi» álemdik tártipti talqylaý: mysaly, 2021 jylǵy 25 mamyrdaǵy óndirýshi salalar máseleleri jónindegi Jahandyq dóńgelek ústel, 2021 jylǵy 31 mamyrdaǵy Dúniejúzilik densaýlyq saqtaý assambleiasynyń 74-sessiiasy, 2021 jylǵy 29 naýryzdaǵy Halyqaralyq qaryz arhitektýrasy jáne ótimdilik virtýaldy forýmyn ataýǵa bolady. QR Prezidenti Ortalyq Aziiadaǵy óńirlik kooperatsiia máselelerine erekshe nazar aýdarady. 2021 jyldyń eń joǵary deńgeidegi alǵashqy oflain kezdesýleri 2-3 naýryzda Nur-Sultanda Qyrǵyzstannyń jańadan sailanǵan prezidenti S.Japarovtyń resmi saparynda jáne 19-20 mamyrda Q.K. Toqaevtyń Dýshanbege resmi saparynda Ortalyq Aziia memleketteriniń kóshbasshylarymen bolǵany kezdeisoq emes», - deidi saiasattanýshy.
Onyń aitýynsha, Qazaqstan Prezidenti halyqaralyq qatynastar jáne diplomatiia salasyndaǵy kópjyldyq tájiribesi bar kásipqoi retinde qazirgi jahandyq daǵdarystyń barlyq uzaqmerzimdi saldaryn tereń túsinip otyr, bul bizdiń elimizge halyqaralyq kún tártibiniń tamyryna nyq senimmen qaraýǵa jáne Qazaqstannyń ulttyq múddelerin tolyq eskeretin salmaqty sheshimder qabyldaýǵa múmkindik beredi.
«Ótken 2 jyl ishinde QR Prezidenti Qasym-Jomart Toqaev tatý kórshilik, ózara tiimdi áriptestik jáne halyqaralyq quqyqty saqtaý qaǵidattaryn qatań ustanatyn sýbekt retinde Qazaqstannyń álemdik arenadaǵy rólin rastady, al iske asyrylyp jatqan syrtqy saiasat, ásirese pandemiia kezeńinde respýblikamyzdyń qazirgi zamanǵy álemniń kez kelgen kúrdeli protsesterine ýaqtyly jáne tiimdi áreket etý qabiletin kórsetti», - dep baǵa berdi Á. Nazarbetova.
Eske sala ketsek, osydan týra eki jyl bury, 2019 jyldyń 9-maýysymynda Qazaqstanda kezekten tys Prezident sailaýy ótti. Sailaýshylardyń 77,5% daýys berýge qatysty. «Nur Otan» partiiasynyń atynan QR Prezidenti kandidattyǵyna túsken Qasym-Jomart Toqaevqa sailaýshylardyń 70,76 %-y daýys bergen.
