Prezident Qasym-Jomart Toqaev Premer-Ministr Asqar Mamindi qabyldady, dep habarlaidy Aqorda.
Memleket basshysyna 2020 jyldyń qorytyndysy boiynsha el damýynyń makroekonomikalyq kórsetkishiniń boljamdy esebi men respýblikadaǵy sanitarlyq-epidemiologiialyq ahýal jaiynda baiandaldy.
Aldyn ala alynǵan málimetterge sáikes, Prezidentke 2020 jyly naqty sektordaǵy óndiris kólemi 2 paiyzǵa artqany jaiynda aqparat berildi. Óńdeý ónerkásibi 3,3 paiyzǵa, onyń ishinde azyq-túlik óndirisi 3,6 paiyzǵa, farmatsevtika 40 paiyzǵa, daiyn metall ónimderin óndirý 20 paiyzǵa, mashina jasaý 16 paiyzǵa, atap aitqanda avtomobil óndirisi 53 paiyzǵa, jeńil ónerkásip 16 paiyzǵa ósken. Solaisha naqty sektor ulttyq ekonomikanyń turaqtylyǵyn saqtaýdyń basty faktoryna ainalǵan.
Asqar Mamin Memleket basshysyna uzaq merzimdi orta kórsetkishter boiynsha qurylys salasynyń qarqyny aitarlyqtai joǵary ekenin aitty. Byltyr qurylys jumystarynyń kólemi 12,5 paiyzǵa artqan. Paidalanýǵa berilgen turǵyn úi kólemi 14,5 paiyzǵa kóbeigen nemese 15 million sharshy metr baspana tapsyrylǵan. Aýyl sharýashylyǵy salasyndaǵy ósim 5,0 paiyzǵa jetken. Taý-ken óndirisindegi temir keni jáne ózge de paidaly qazbalar boiynsha ósim saqtaldy.
Qasym-Jomart Toqaevqa elimizdegi sanitarlyq-epidemiologiialyq ahýal baqylaýda ekenin baiandaǵan Premer-Ministr kúndelikti jańadan indetke shaldyqqandardyń sany 0,46 paiyzǵa óskenin, elimiz boiynsha koronavirýstyń órshý deńgeiiniń kórsetkishi 0,9 paiyzdy quraitynyn jetkizdi. Juqpaly aýrýlar aýrýhanalarynyń 29 paiyzynda, jansaqtaý bólimderiniń 21 paiyzynda adamdar emdelip jatyr.
Prezidentke investitsiia tartý, halyqty jumyspen qamtý, áleýmettik mańyzy bar taýarlardyń baǵasyn turaqtandyrý jáne basqa da eldiń áleýmettik-ekonomikalyq damýyndaǵy ózekti máseleler boiynsha qabyldanǵan sharalar jaiynda esep berildi.
