Foto: Aqorda
Memleket basshysy Qazaqstanǵa resmi saparmen kelgen Majarstan Prezidentimen kezdesti, dep habarlaidy Ult.kz.
Qasym-Jomart Toqaev shaqyrýyn qabyl alyp, Astanaǵa kelgeni úshin Tamash Shýiokqa alǵys aitty.
– Sizdiń bul alǵashqy resmi saparyńyz yntymaqtastyǵymyzdy nyǵaitý turǵysynan óte mańyzdy oqiǵa. Majarstan – bizdiń egemendigimizdi alǵash moiyndaǵan eýropalyq memleketterdiń biri. Al Býdapesht – resmi diplomatiialyq missiiamyzdy qabyldaǵan birinshi eýropalyq qala. Sondyqtan Sizdiń elińizben kóptegen saladaǵy tyǵyz yqpaldastyqty qoldaimyz. Eki eldiń múddesine sai keletin bul úrdis jalǵasyn tabatynyna senimdimin. Sol sebepti biz saiasi, ekonomikalyq bailanystarymyzdy odan ári keńeitýge barynsha kúsh salamyz, – dedi Memleket basshysy.
Tamash Shýiok qonaqjailyq tanytqany úshin Qasym-Jomart Toqaevqa alǵys aityp, elderimizdiń arasynda senimge, ózara qurmet pen tarihi bailanysqa negizdelgen belsendi dialog ornaǵanyn atap ótti.
– Halyqtarymyzdyń dostyǵy ǵasyrlar qoinaýynan tamyr tartady. Qazir de saiasi qarym-qatynasymyz óte joǵary deńgeige jetti dep oilaimyn, ekonomikalyq bailanystarymyz da qarqyndy damyp keledi. Sondai-aq tańerteń ótken Digital Bridge 2025 forýmynda aitqanymdai, qos memleket arasyndaǵy yqpaldastyqtyń bolashaǵy zor. Biz kóptegen jobalar men bastamalardy birlese iske asyrýdy josparlap otyrmyz, – dedi Majarstan Prezidenti.
Kelissóz barysynda taraptar saýda-ekonomikalyq seriktestikti keńeitý máselelerin talqylady. Qazaqstan men Majarstannyń mádeni jáne bilim berý salalaryndaǵy bailanysyn nyǵaitýdyń mańyzyna toqtaldy.
Qasym-Jomart Toqaev pen Tamash Shýiok halyqaralyq kún tártibindegi ózekti máseleler boiynsha pikir almasyp, kópjaqty qurylymdar aiasyndaǵy yntymaqtastyq perspektivasyn qarastyrdy.
Budan keiin Qazaqstan men Majarstan prezidentteri keńeitilgen quramda kelissóz júrgizdi.
Memleket basshysy Astana men Býdapesht arasyndaǵy tyǵyz ári senimdi qarym-qatynas ǵasyrlar qoinaýynan tamyr tartatynyn jáne ózara qurmetke negizdelgenin atap ótti.
Qazaqstan Prezidenti ótken jyly Majarstanǵa jasaǵan sapary birqatar mańyzdy kelisimderge qol qoiylýymen erekshelengenin jetkizdi. Bul eki el arasyndaǵy uzaq merzimdi yntymaqtastyq pen baýyrlastyq bailanystardy nyǵaitý úshin jańa perspektivaǵa jol ashty.
Memleket basshysynyń aitýynsha, ekijaqty saýda-ekonomikalyq qarym-qatynastardyń berik negizi men zor áleýeti bar.
– Byltyr taýar ainalymy shamamen 200 million dollarǵa jetkenin, al biylǵy segiz aida 22 paiyz óskenin (164,5 million dollar) erekshe yqylaspen atap ótkim keledi. Búginde Qazaqstan ekonomikasyna 400 million dollarǵa jýyq investitsiia salǵan 35-ten asa majar kompaniiasy jumys istep jatyr. Biz qazirdiń ózinde aýyl sharýashylyǵy, jańartylatyn energiia, densaýlyq saqtaý, logistika men qarjy salalarynda 607 million dollarǵa baǵalanatyn 20 birlesken jobany iske asyryp jatyrmyz, – dedi Qazaqstan Prezidenti.
Taraptar mádeni-gýmanitarlyq yqpaldastyq máselelerine mán berdi. Halyqtarymyzdyń tarihi jaqyndyǵy men baýyrlastyǵynyń dáleli retinde 2023 jyly Astana kósheleriniń birine kórnekti majar aqyny Shandor Petefidiń esimi berilgen bolatyn.
Prezident jyl saiyn elimizdiń 250 stýdenti majar ýniversitetterinde oqitynyna toqtalyp, bilim almasýdyń mańyzyn atap ótti. Sonymen qatar otandyq joǵary oqý oryndary da majarlyq stýdentter men zertteýshilerdi kóptep qabyldaýǵa daiyn ekenin málimdedi.
Tamash Shýioktyń aitýynsha, Qazaqstanmen jan-jaqty bailanystardy damytý Majarstannyń syrtqy saiasatynda airyqsha oryn alady.
– Halyqtarymyzdyń san ǵasyrdan beri jalǵasqan bailanysynyń tini berik ekenin udaiy baiqap júrmiz. Majarlyqtar ózderiniń shyǵystaǵy túp tarihyna árdaiym qyzyǵýshylyqpen qaraidy. Sondyqtan elimiz Shyǵys pen Batys, Ortalyq Aziia men Ortalyq Eýropa arasyndaǵy altyn kópir retinde missiiasyn únemi atqaryp keledi. Prezident myrza atap ótkendei, 2014 jyly Strategiialyq seriktestik týraly kelisimge qol qoiylyp, bul qarym-qatynasymyzdyń negizin qalady. Ekonomikalyq yntymaqtastyqtyń aiasy keńeiip kele jatyr. Al mádeniet pen bilim salasyndaǵy yqpaldastyǵymyz kóp jurtqa úlgi. Bul artyq aitqandyq emes. Qazaqstanmen bailanysymyzdy strategiialyq turǵydan mańyzdy dep sanaimyz ári joǵary baǵalaimyz. Qazirgidei daǵdarys kezeńinde Shyǵys pen Batys arasyndaǵy yntymaqtastyq airyqsha mánge ie bola bastady, – dedi Majarstan Prezidenti.
Kelissóz barysynda saýda-investitsiia, energetika sektory, atom energiiasy, kólik-logistika, qarjy, tsifrlandyrý jáne jasandy intellekt sekildi salalardaǵy ekijaqty yntymaqtastyq máseleleri keńinen qarastyryldy.
Memleketter basshylary halyqaralyq saiasattyń basty máselelerine qatysty eki eldiń ustanymdary uqsas jáne kópjaqty formattaǵy tyǵyz yqpaldastyqty jalǵastyrýǵa daiyn ekenin rastady.
