Foto: Aqorda
Qasym-Jomart Toqaev mártebeli meimanǵa iltipat bildirip, onyń sapary Qazaqstan-Sloveniia seriktestigin tereńdetýge septigin tigizip, keń múmkindikterge jol ashatynyn aitty, dep habarlaidy Ult.kz.
"Sloveniiamen tyǵyz yntymaqtastyq qurýǵa niettimiz. Bul – anyq. Prezident retinde ózara múddemizge sai keletin barlyq saladaǵy bailanysty nyǵaitýǵa kúsh-jigerimdi salamyn. Biz Sloveniiany Qazaqstannyń Balqan túbegindegi negizgi jáne óte mańyzdy seriktesteriniń biri retinde qarastyramyz. Sizdiń eldiń biznes ókilderine jáne úkimetińizge birqatar utymdy joba usyna alamyz", – dedi Memleket basshysy.
Prezidenttiń aitýynsha, Sloveniianyń Qazaqstan ekonomikasyna salǵan tikelei investitsiiasynyń kólemi 200 million dollarǵa jýyqtady. Elimizdegi farmatsevtika, mashina jasaý, telekommýnikatsiia jáne jańartylatyn energiia kózderi salalarynda Sloveniia kapitalynyń úlesi bar 19 kompaniia kásibin tabysty júrgizip keledi. Budan bólek, Qazaqstan men Sloveniianyń kólik-logistika, tsifrlandyrý jáne innovatsiia, densaýlyq saqtaý, týrizm baǵyttarynda ózara seriktestikti arttyrýǵa áleýeti zor.
Sloveniia Prezidenti ózine jáne delegatsiiasyna qonaqjailyq tanytqany úshin Qasym-Jomart Toqaevqa shynaiy rizashylyǵyn jetkizdi.
"Diplomatiialyq qarym-qatynas ornaǵan 33 jyl ishinde eki el arasynda birde bir sheshilmegen másele bolǵan emes. Munyń ekonomikalyq yntymaqtastyqty keńeitýge, órkendetýge mol múmkindik beretinin durys atap óttińiz. Sondyqtan ózimmen birge biznes ókilderiniń úlken delegatsiiasyn alyp keldim. Olar qazaqstandyq áriptestermen birge seriktestikti ilgeriletýge qatysty baǵyttardy talqylap jatyr. Ekonomikalyq yqpaldastyǵymyz artyp keledi. Degenmen budan da zor jetistikterge jetemiz dep oilaimyn. Prezidentter men saiasatkerler arasyndaǵy bailanystar árqashan bolashaqqa baǵdarlanady. Óitkeni saiasatkerler biznestiń kókjiegin keńeitedi", – dedi Natasha Pirts-Mýsar.
Sondai-aq kelissóz barysynda taraptar jahandyq jáne óńirlik kún tártibindegi ózekti máseleler boiynsha jan-jaqty pikir almasty.
