Qazaqstan Prezidenti Qasym-Jomart Toqaev - postkeńestik aýmaqta ǵana emes, álemdik, jahandyq aýqymdaǵy tanymal saiasatkerlerdiń biri. Bul pikirdi Ózbekstan Ǵylym akademiiasy Tarih institýty «Zamanaýi tarih jáne halyqaralyq zertteýler» bóliminiń meńgerýshisi, filosofiia ǵylymdarynyń kandidaty Ravshan Nazarov aitty, dep habarlaidy QazAqparat agenttiginiń menshikti tilshisi.
Ózbekstandyq sarapshynyń aitýynsha, QR Prezidenti Qasym-Jomart Toqaev saiasi ortada ǵana emes, sarapshylar qaýymynda da úlken bedelge ie.
Sarapshy Prezidenttiń ótken jyldaǵy basty jetistikteri qatarynda sarapshy memlekettik baǵyttyń birizdiligi qamtamasyz etilip, jańa ishki saiasi paradigmalar jariialanǵanyn atap ótti. Biliktiń saiasi leksikony ózgerip, oǵan «balama», «pliýralizm», «kezeń-kezeńimen saiasi jańǵyrý» sekildi uǵymdar kirdi.
R. Nazarovtyń pikirinshe, jańa Prezident tusynda jańa saiasi standarttar paida boldy.
«Resmi is-sharalardyń formaty ózgerip, olar ashyq bola tústi. Munyń barlyǵy - saiasi basqarý turǵysynan óte mańyzdy qadamdar, olar basqarýshy mekemeniń minez-qulyq modeline jańa standarttar ornatyp, bileýshi elita úshin talapty kúsheitedi», - dedi sarapshy.
Onyń aitýynsha, Qazaqstanda azamattardyń negizgi quqyqtaryn qorǵaý kúsheitildi, memlekettik apparattyń basqarylýy men onyń atqarý tártibi saqtaldy.
Ásirese, sarapshy tutas qoǵam men halyqtyń jekelegen toptarynyń áleýmettik kóńil-kúiine baǵyttalǵan sharalar keshenin airyqsha atap ótti. Munda qoǵamnyń memleketke degen senimi men memlekettik basqarý tiimdiligi artqan.
«Ulttyq ideologiiany júzege asyrýdyń jańa basymdyqtary anyqtaldy. Biyl filosof ál-Farabidiń 1150 jyldyǵy, aqyn Abaidyń 175 jyldyǵy, Altyn ordanyń 750 jyldyǵy toilanady. Semei qalasynyń áýejaiyna Abai, Atyraý áýejaiyna - ushqysh Hiýaz Dospanovanyń esimi berildi. «Oralman» sózi qoldanystan alynyp, «qandas» termini engizildi», - dedi R. Nazarov.
Jalpy Qazaqstan Prezidenti men búkil álem aldynda ekonomikalyq retsessiia men koronavirýs pandemiiasy syndy jańa syn-qater tur.
Álem jańa qiyndyqqa tap kelgen kúrdeli halyqaralyq jaǵdaida Qasym-Jomart Toqaev ózin tabandy ári jigerli saiasatker retinde kórsete aldy.
