Parlament Senatynyń Tóraǵasy Qasym-Jomart Toqaev Ózbekstannyń Olii Májlisi Zańnama palatasynyń tóraǵasy Nýrdinjon Ismoilovpen kelissóz ótkizdi, dep jazady Senattyń baspasóz qyzmeti.
Q.Toqaev Qazaqstan men Ózbekstan basshylarynyń kúsh-jigeriniń arqasynda eki el arasyndaǵy qatynastar sońǵy jyldary jańa qarqynǵa ie bolǵanyn atap ótti.
«Elderimizdiń belsendi yntymaqtastyǵy jáne búkil Ortalyq Aziianyń tabysty ekonomikalyq damýy, turaqtylyǵy men qaýipsizdigi Qazaqstan men Ózbekstannyń halyqaralyq arenadaǵy ózara is-qimylyna bailanysty», - dedi Senat tóraǵasy.
Júzdesýshiler Prezident N.Nazarbaevtyń «Uly dalanyń jeti qyry» maqalasy boiynsha pikir almasty. Q.Toqaev atap ótkendei, Elbasy óziniń maqalasynda ótkenniń murasyn shyǵarmashylyq turǵyda zerdelep, bizdiń halqymyzdyń jahandyq órkenietke qosqan úlesin laiyqty baǵalaýdy usynady.
«Elimizdiń damýynyń keleshegin jańa qyrynan baǵalaý úshin biz eń aldymen óz tarihymyzdy maqtan tutýǵa tiispiz», - dedi Q.Toqaev.
Senat tóraǵasynyń aitýynsha, Prezident bastaǵan iri jobalar «Rýhani jańǵyrý» baǵdarlamasynyń zańdy jalǵasy bolǵaly otyr.
Q.Toqaev sondai-aq Ózbekstanmen parlamentaralyq yntymaqtastyqty jáne ózbek áriptesterimizben halyqaralyq uiymdar aiasynda bailanystardy nyǵaitý qajettigin atady.
Kezdesýge qatysýshylar eki eldiń zań shyǵarý organdarynyń saýda-ekonomikalyq, kólik-tranzit jáne gýmanitarlyq bailanystardy keńeitýdi yntalandyrýǵa ázir ekenin naqtylady.
Q.Toqaev 15 qarashada Shymkentte ótken alǵashqy Aimaqaralyq forýmnyń qorytyndylaryn joǵary baǵalap, iskerlik qaýymdardyń osyndai kezdesýlerin jalǵastyrýdyń mańyzdy ekenin atap ótti. Senat Tóraǵasynyń pikirinshe, mundai sipattaǵy kezdesýler shekara mańyndaǵy bailanystarǵa salmaqty serpin berip, ekijaqty saýdaǵa eleýli túrde qarqyn bere alady. Eki el basshylarynyń aitýynsha, 2020 jylǵa qarai Qazaqstan men Ózbekstan arasyndaǵy saýda kólemi 5 milliard dollarǵa deiin jetýi tiis.
Q.Toqaevtyń pikirinshe, degenmen mundai joǵary kórsetkishke qol jetkizý úshin eki el úkimetteri men parlamentteriniń aýqymdy kúsh-jigeri qajet.
Óz kezeginde, N.Ismoilov ózbek tarapy elderimiz arasyndaǵy dostyq qatynas pen yntymaqtastyqty nyǵaitýǵa bar kúshin salýǵa ázir ekenin jetkizdi.
