Memleket basshysy «Nur Otan» partiiasynyń kezekten tys HHI sezine qatysty, dep habarlaidy "Ult aqparat" Aqordanyń resmi saityna silteme jasap.
Qasym-Jomart Toqaev «Nur Otan» partiiasynyń kezekten tys HHI sezine beinebailanys rejiminde qatysty. Sondai-aq jiynǵa Tuńǵysh Prezident – Elbasy, Prezident Ákimshiliginiń basshylyǵy, partiianyń Saiasi keńesiniń músheleri qatysty. Otyrysty partiia Tóraǵasynyń birinshi orynbasary júrgizdi.
Elbasy Nursultan Nazarbaevtyń sózinen jáne daýys berý rásiminen keiin Qazaqstan Prezidenti Qasym-Jomart Toqaevty «Nur Otan» partiiasynyń Tóraǵalyǵyna sailaý týraly Sezd qaýlysy qabyldandy. Sodan keiin Memleket basshysy jiynǵa qatysýshylar aldynda sóz sóiledi.
Qasym-Jomart Toqaev partiianyń jańa kóshbasshysy retinde sóilegen sózinde partiiany basqarýǵa usynys jasaǵany jáne qoldaý kórsetkeni úshin rizashylyǵyn bilidirip, «Nur Otan» partiiasyna tóraǵalyq etý asa jaýapty jumys ekenin atap ótti.
Prezident halqymyzdy dúrbeleńge salǵan qańtardyń basyndaǵy qaiǵyly oqiǵalar týraly aita kele, lańkester men qylmyskerlerge toitarys berip, memleketimizdiń tutastyǵyn saqtap qalǵanymyzdy málimdedi.
– Quzyrly organdar kináli adamdardy anyqtap, jaýapqa tartý úshin tergeý júrgizýde. Bul jumys tek zań aiasynda júzege asyrylatynyna kúmán bolmaýǵa tiis. Bári Bas Prokýratýranyń jáne meniń jeke baqylaýymda bolady. Adam quqyǵyn mindetti túrde saqtaimyz. Budan bylai mundai qasiretke jol bermeimiz, – dedi Prezident.
Memleket basshysy qoǵamdyq qundylyqtar júiesine, saiasi jáne áleýmettik-ekonomikalyq salalarǵa túbegeili ózgeris engizý qajet ekenine nazar aýdardy.
– Azamattyq qoǵam institýttaryna zor mindet júkteledi. Ásirese, saiasi partiialar airyqsha ról atqarýǵa tiis. Sonyń ishinde bizdiń partiiamyzdyń alatyn orny erekshe. «Nur Otan» Qazaqstandy nyǵaitýǵa baǵyttalǵan mańyzdy reformalardyń bastaýynda bolyp, túrli salada naqty jetistikke jetýimizge eleýli úlesin qosty, – dedi Memleket basshysy.
Qasym-Jomart Toqaev óz sózinde Elbasynyń jeke basyna qatysty el ishinde tarap jatqan túrli jaǵymsyz áńgimelerge túsindirme berdi.
– Tuńǵysh Prezidentimiz elimizdi irgesi berik memleketke ainaldyrý úshin zor eńbek sińirdi. Ol Otanymyzdyń jáne álem tarihynda Táýelsiz Qazaqstannyń negizin qalaǵan tulǵa retinde qalatyny sózsiz. Elbasynyń 30 jylda el múddesi úshin atqarǵan jumysyn joqqa shyǵarýǵa bolmaidy. Bul – tarihqa qiianat jasaý degen sóz, – dedi Memleket basshysy.
Qasym-Jomart Toqaevtyń pikirinshe, Qazaqstan halqy Nursultan Nazarbaevtyń tulǵasyna baǵa bergen kezde tarihi derekterge shynaiy túrde súienýi qajet.
– Nursultan Ábishuly Nazarbaev otandyq jáne álemdik jylnamada Qazaqstan Respýblikasynyń negizin qalaýshy degen atpen qalady. 90-shy jyldardyń basynda Qazaqstannyń demografiialyq ereksheligine jáne shekarasynyń shegendelmeýine bailanysty belgili saiasatkerler men saiasattanýshylar elimizdi ydyrap ketedi dep boljam jasaǵan bolatyn. Osyndai qily zaman, tarihi kezeńde Nursultan Ábishuly Nazarbaev memleket qurý jónindegi kúrdeli missiiany óz moinyna aldy. Bul, shyn máninde, óte aýyr mindet edi, – dedi Qazaqstan Prezidenti.
Qasym-Jomart Toqaev Elbasynyń naryqtyq ekonomikany qalyptastyrýǵa, jan-jaqty reformalardy júzege asyrýǵa, Táýelsizdiktiń eleń-alań kezinde áleýmettik-ekonomikalyq sipattaǵy kóptegen problemany sheshýge qosqan úlesin eske saldy. Sondai-aq memlekettik shekarany rásimdeýge, qaýipsizdikti qamtamasyz etýge, elimizdiń geosaiasi tuǵyryn nyǵaitýǵa jáne astanany kóshirý isine sińirgen zor eńbegin atap ótti.
– Ol Amerikanyń bes prezidentimen, keńestik jáne reseilik bes basshymen, Qytaidyń birqatar tóraǵalarymen jáne basqa da kóptegen memlekettiń basshylarymen, sondai-aq BUU-nyń tórt bas hatshysymen jumys istedi. Álemdik qoǵamdastyqta ony jahandyq iadrolyq qarýǵa qarsy qozǵalystyń kóshbasshysy dep ataidy. Sonymen qatar Táýelsizdik jyldary Qazaqstannyń barlyq ekonomikalyq kórsetkish boiynsha Ortalyq Aziia keńistiginde aldyńǵy orynǵa shyqqanyn umytpaýymyz kerek. Sondyqtan Tuńǵysh Prezidenttiń tarihi eńbegin umytpaiyq. Túptep kelgende, shynaiy ári ádil bolǵan jón. Ótkenin qaralaǵan halyqtyń bolashaǵy bulyńǵyr, – dedi Qasym-Jomart Toqaev.
Prezident el basqarý isinde jiberiletin kemshilikter týraly aita kele, qatelikterge Amerikanyń da, Qytaidyń da basshylary, tipti Singapýrdyń alǵashqy Premer-ministri Li Kýan Iu da boi aldyrdy degen pikir bildirdi.
– Biraq Singapýrdyń da, AQSh-tyń da, Qytaidyń da halyqtary jáne basqarýshy toptary kúrishti kúrmekten ajyrata bilip, ózderiniń basshylaryn kemshilikterden joǵary qoidy. "Jumys istemeitin adam ǵana qatelespeidi" degen sóz burynnan belgili. Sondyqtan Tuńǵysh Prezidenttiń tiisti tarihi eńbegine laiyqty baǵasyn bereiik. Al ketken qatelikter, elimizdiń keleshek basshylaryna sabaq bolsyn. Memleketimizdiń bolashaǵy turǵysynan alǵanda bunyń durys bolatynyna senimdimin, – dedi Qasym-Jomart Toqaev.
Sonymen qatar, Memleket basshysy óz sózinde «qasiretti qańtar» oqiǵasynyń Táýelsizdik alǵan jyldardaǵy eń aýyr synaq bolǵanyn atap ótti. Prezident qoǵamnyń kemeldigi men memlekettiń kúsh-qýatyn synap kórýge arnalǵan emtihandy sátti tapsyrǵanymyzdy aitty. Osy rette Prezident bul oqiǵalardyń barlyq sebep-saldaryn tereń taldap, tiisti sabaq alý qajet dep sanaidy.
– Elimiz damýdyń óte kúrdeli kezeńine aiaq basqanyn túsine otyryp, «Nur Otan» partiiasyn basqarý usynysyn rizashylyqpen qabyldaimyn. Bul sheshim partiiany transformatsiialaý jáne búkil qoǵamdy uiystyrý jumystaryna kirisýge daiyndyqty bildiredi. Osy rette men Memleket basshysy retinde ashyq jáne ádil saiasi básekelestik bolatynyna kepildik beremin. Meniń konstitýtsiialyq mindetim – barlyq bilik tarmaǵynyń kelisilgen is-áreketin jáne memlekettik organdardyń halyq aldyndaǵy jaýapkershiligin qamtamasyz etý. Árine, bul jaǵdailar Prezidenttiń kez kelgen partiia men qozǵalystardyń qyzmetinen belgili bir dárejede alshaqtaýyn talap etedi. Sondyqtan biraz ýaqyttan keiin, bálkim osy jyldyń ishinde, «Nur Otan» partiiasyna odan ári tóraǵalyq etýimniń oryndylyǵy týraly máselege qaita oralamyz. Memleket basshysynyń teń qashyqtyqtaǵy mártebesi saiasi reformalardyń aýqymdy toptamasynda birjola bekitilýi kerek, – dedi Qasym-Jomart Toqaev.
Prezident elimizdi jan-jaqty jańǵyrtý úshin usynylǵan aýqymdy máseleni eske saldy. Onyń pikirinshe, «Nur Otan» reformalardy júzege asyrýǵa belsene atsalysýǵa, Qazaqstandy qarqyndy túrde qaita qurýdyń jáne jańartýdyń negizgi qozǵaýshy kúshi retinde áreket etýge tiis.
– Bul úshin «Nur Otan» ózin-ózi jańartýy kerek. Partiianyń búkil jumysyn sóz júzinde ǵana emes, túbegeili qaita qurý qajet, – dedi Qasym-Jomart Toqaev.
Memleket basshysy partiia múshelerin tómendegi basymdyqtarǵa basa mán berýge shaqyrdy.
Prezident partiia ishindegi yntymaqty nyǵaitýdy, qoǵamdaǵy barlyq konstrýktivti kúshti biriktirýdi birinshi mindet retinde atady. Onyń aitýynsha, Jańa Qazaqstandy qurý úshin aýyzbirshiliktiń, seriktestiktiń, nyq ustanym men bolashaqqa senimniń mańyzy zor.
Sonymen qatar Qasym-Jomart Toqaevtyń aitýynsha, partiia memlekettik organdardyń jumysyn qaitalamaýy kerek. Prezident «Nur Otan» partiiasy negizinen ideologiialyq jáne kadrlyq jumystarmen ainalysyp, qajet jaǵdaida memlekettik apparattyń jumysyna jol siltep otyrýy kerek ekenine nazar aýdardy.
– Partiianyń ómirsheńdigi sailaýaldy ýádelerdiń qanshalyqty oryndalatynyna bailanysty ekenin túsiný kerek. Meniń oiymsha, shyndyqqa janaspaityn jáne oryndalmaityn ýáde bermegen abzal. «Aryq aityp, semiz shyqqan» jón. Aqiqatqa týra qaraý qajet. Sondyqtan partiia Úkimetpen jáne ákimdiktermen birlese otyryp, sailaý aldyndaǵy ýádelerdiń oryndalýyn túbegeili qadaǵalaýy kerek, – dedi Memleket basshysy.
Budan bólek, Prezident partiianyń uiymdyq qurylymyn qaita qaraýdy, atap aitqanda, birinshi orynbasar laýazymyn atqarýshy hatshy qyzmetimen almastyrýdy, sondai-aq tiisti baǵyttar boiynsha basqa da hatshylardyń laýazymdaryn qaita qarastyrýdy tapsyrdy.
Qasym-Jomart Toqaev qoǵamdyq keńesterdiń qazirgi josparlaryn, olardyń jeke quramdaryn qosa alǵanda túbegeili jańartýǵa, basqa partiialar men qoǵamdyq birlestiktermen aradaǵy yntymaqtastyqty jolǵa qoiýǵa shaqyrdy.
Prezident Májilistegi partiianyń fraktsiiasyn qaita qaraý, partiia músheleriniń óńirlerdegi ózekti áleýmettik-ekonomikalyq máselelerdi sheshýge atsalysýyn kúsheitý, qoǵamdyq qabyldaýlar qyzmetin jandandyrý, partiianyń sybailas jemqorlyqpen kúres jónindegi strategiiasyn jańa mazmunda tolyqtyrý, partiia quramyndaǵy tolyp jatqan tiianaqsyz, tabansyz, mansapqumar tulǵalardy oryndarynan alý, sondai-aq partiianyń «Jas Otan» jastar qanatynyń jumysyn sapaly túrde kúsheitý qajet dep sanaidy.
Qasym-Jomart Toqaev «Qazaqstan halqyna» qorynyń qyzmetine arnaiy toqtaldy. Qorǵa aqshalai úles qosqan kásipkerlerge rizashylyǵyn bildirdi. Sonymen qatar oligopoliianyń bir bóligi, tipti sonyń dál ózi bolyp tabylatyn biznestegi keibir belgili tulǵalardyń Prezident bastamashy bolǵan qaiyrymdylyq aktsiiasyna qatysýǵa asyqpaityndaryn atap ótti.
– Buny qalai túsinýge bolady? Sarańdyq pa, nigilizm be, salǵyrttyq pa álde mensinbeý me? Qalai bolǵanda da, bul suraqtyń jaýabyn alýǵa memlekettiń quzyreti jetedi. Iri biznes tarapynan jasalatyn qaiyrymdylyq úderisin retteitin arnaýly Jarlyq shyǵarýdy josparlap otyrmyn, – dedi Memleket basshysy.
Qasym-Jomart Toqaev sóziniń sońynda Prezident qyzmetinde bolsyn jáne partiia jumysynda bolsyn el múddesine berik bolý qaǵidatyn ustanatynyn jetkizdi.
– «Nur Otan» – elimizdiń negizgi saiasi kúshi. Sondyqtan Qazaqstannyń bolashaǵy úshin, eń aldymen, bizdiń partiiamyz jaýapty. Árqaisymyz osy jaýapkershilikti tereń sezinip, jumys isteýimiz qajet. Shyn máninde, «Nur Otan» memleketshilder partiiasy bolýy kerek. Uiym músheleri memleket múddesin bárinen biik qoiýǵa tiis, – dedi partiia Tóraǵasy.
