Foto: Aqorda
Qazaqstan Prezidenti Qasym-Jomart Toqaev mýzeilerdiń tarih pen mádeniettiń asyl qazynasy ekenin atap ótip, olardyń damýyna memleket tarapynan erekshe kóńil bólinip jatqanyn málimdedi, dep habarlaidy Ult.kz.
Prezidenttiń aitýynsha, sońǵy ýaqytta elimizdiń jetekshi úsh mýzeiine ulttyq mártebe berý olardyń qyzmetine tyń serpin ákeldi. Bul mártebe ǵylymi-zertteý jumystaryn kúsheitýge jáne tarihi-mádeni eskertkishterdi zerdeleýde mýzeilerdiń áleýetin tolyq paidalanýǵa múmkindik týǵyzady.
"Saraishyq qalashyǵy zertteýshilerdiń erekshe qyzyǵýshylyǵyn týdyrady. Oǵan jańǵyrtý jumystaryn júrgizý qajet. Sonymen qatar Ortalyq Aziia elderiniń tarihi-mádeni murasyna arnalǵan biryńǵai tsifrlyq platforma qurý týraly bastamanyń bereri mol", – dedi Qasym-Jomart Toqaev.
Memleket basshysy Qazaqstannyń tarihi jáne mádeni eskertkishterin IýNESKO-nyń Búkilálemdik muralar tizimine engizý boiynsha jumystar júrgizilip jatqanyn atap ótti. Sondai-aq, qujattyq muralardy «Álem jady» tizimine engizý de mańyzdy baǵyt retinde qarastyrylýda.
"Biyl áigili kompozitor Nurǵisa Tilendievtiń 100 jyldyǵyn IýNESKO deńgeiinde atap ótemiz. Mereili datalarǵa orai ótetin is-sharalar mazmundy, taǵylymdy bolýy kerek. Halyq rýhaniiatynyń taǵy bir mańyzdy qyry – sáýlet óneri. Qalalar men eldi mekender kelbeti – ult mádenietiniń ainasy. Ulttyq arhitektýra, túptep kelgende, ulttyq sanaǵa yqpalyn tigizedi, – dep atap ótti Prezident.
Sonymen qatar, Qasym-Jomart Toqaev sáýlet ónerin ulttyq naqyshqa beiimdeitin jas talanttarǵa qoldaý kórsetýdiń mańyzdylyǵyn aitty. Osy maqsatta jas sáýletshilerdiń baiqaýyn uiymdastyrý jáne Ulttyq syilyq taǵaiyndaý týraly usynys bildirdi.
