Is-sharaǵa Qazaqstannyń barlyq óńirinen kelgen muǵalimder, oqý oryndarynyń oqytýshylary, ǵalymdar, qoǵam qairatkerleri, memlekettik organdardyń ókilderi qatysty, dep habarlaidy "Ult aqparat" Aqordaǵa silteme jasap.
Qasym-Jomart Toqaev óz sózinde jańa býyndy tárbieleýdegi muǵalimderdiń rólin atap ótti.
– Elimizdiń laiyqty azamattaryn tárbieleý – pedagogtardyń jáne ata-analardyń mindeti. Laiyqty azamat – bul óz bilimin Otanymyzdyń igiligi úshin jumsaityn adam. Aldymyzda turǵan qubylmaly zamanda jastarymyz eńbekqor bolmasa, eshqandai básekege túse almaitynyn tereń túsinýi kerek, – dedi Prezident.
Memleket basshysynyń aitýynsha, bilim jáne ǵylym salasynyń damýyna tyń ári tegeýrindi serpin qajet.
– Bilim sapasyn kóterý úshin keshendi sharalar qabyldaý qajet. Bul, aldymen, muǵalimderdiń biliktiligine, oqýlyqtardyń sapasyna, zaman talabyna sai infraqurylym men materialdyq qorǵa bailanysty máseleler. Atalǵan baǵyttar boiynsha tiimdi jumys isteý qajet, iaǵni týyndaǵan máselelerdi der kezinde anyqtap, olardy sheshýdiń ońtaily joldaryn usyný kerek, – dep málimdedi Qasym-Jomart Toqaev.
Prezident muǵalimderdiń biliktiligin baǵalaý ideiasyn júzege asyrýdaǵy biýrokratiia men birjaqtylyqqa, sondai-aq oqytýshylardyń óz kásibinen tys túrli is-sharalarǵa tartylýyna qatysty syni kózqarasyn bildirdi.
– Jergilikti ákimdikterdiń óz ókilettilikterin asyra paidalanyp, muǵalimderdi bilim berý salasyna esh qatysy joq ákimshilik is-sharalarǵa tartý jaǵdailary tolastamai tur. Atalǵan máselelerdi sheshý úshin Úkimetke shuǵyl, naqty sharalar qabyldaýdy tapsyramyn, – dedi Memleket basshysy.
Sonymen qatar Qasym-Jomart Toqaev mektepke deiingi bilim berý jáne tárbieleý júiesiniń sapasyn arttyrý, sondai-aq orta bilim berýdi odan ári damytý strategiiasyn aiqyndaý jóninde sharalar qabyldaýdy tapsyrdy.
– Álem elderiniń 60 paiyzynda mektepte bilim berý 6 jastan bastalady, iaǵni mundai júie balanyń ziiatkerlik jáne áleýmettik jaǵynan erterek damýyna oń yqpal etedi. Úkimetke Bilim men ǵylymdy damytýdyń 2025 jylǵa deiingi jańa baǵdarlamasy aiasynda
12-jyldyq bilim berý modeline birtindep, josparly negizde kóshýdi qamtamasyz etýdi tapsyramyn, – dep atap ótti Prezident.
Memleket basshysy «Jas maman» jobasynyń júzege asyrylýyn, tehnikalyq jáne kásibi bilim berý júiesin damytý jumysyn pysyqtaý, sondai-aq úsh aýysymdy jáne shaǵyn komplektili mektepter máselesin sheshý qajet ekenine nazar aýdardy.
Qasym-Jomart Toqaev Bilim jáne ǵylym ministrligine úshtildi oqytý júiesin engizý úderisin qaita qaraýdy tapsyrdy. Atalǵan másele oqytýshylar men bilim berý baǵdarlamalarynyń daiyndyǵyn eskere otyryp, jan-jaqty zertteýdi qajet etedi.
– Jaratylystaný pánderin aǵylshyn tilinde oqytý bilim ortalyqtarynyń kadrlyq múmkindigine qarai, oqýshylar men ata-analardyń qalaýy boiynsha iske asýy tiis. Sondyqtan, aǵylshyn tilin oqytýdy 2-3-shi synyptan nemese ata-analardyń qalaýyna qarai 5-shi synyptan bastaý oryndy ári tiimdi bolady dep sanaimyn, – dep, Prezident óz ustanymyn jetkizdi.
Memleket basshysy muǵalimder jalaqysynyń mólsherin arttyrýdy aldyńǵy qatardaǵy mindet ekenin atap ótti.
– Bul saladaǵy eńbekaqy eń tómen jalaqylardyń qatarynda, iaǵni el ekonomikasy boiynsha ortasha jalaqynyń 65 paiyzyn quraidy. Bilim berý júiesine bilikti kadrlardy tartý maqsatynda Úkimetke tórt jyl ishinde muǵalimderdiń eńbekaqysyn 2 ese kóbeitýdi tapsyramyn, – dedi Qasym-Jomart Toqaev.
Budan bólek, Prezident barlyq bilim berý baǵdarlamalary men standarttaryn bir deńgeide ázirlep, qala jáne aýyl balalarynyń bilim deńgeiindegi alshaqtyqtardy joiýdy jáne turǵylyqty jeri men ata-analarynyń áleýmettik jaǵdaiyna qaramastan balalarǵa sapaly bilim alýǵa múmkindik berýdi tapsyrdy.
Memleket basshysy ǵylymdy qarjylandyrý júiesiniń ashyqtyǵyn qamtamasyz etý, ulttyq ǵylymi keńesterdiń jumysyn jetildirý qajettiligine basa mán berdi. Prezidenttiń pikirinshe, ǵylymdy odan ári institýtsionaldy damytý tujyrymdamasyn ázirleý qajet.
Konferentsiianyń sońynda Qasym-Jomart Toqaev otandyq bilim berý salasyn damytýǵa qosqan úlesi jáne belsendi qoǵamdyq qyzmeti úshin birqatar ustazdy marapattady.
Atap aitqanda, «Qurmet» ordenimen – Pavlodar qalasynyń №8 daryndy balalarǵa arnalǵan mektep-litseiiniń muǵalimi Anatolii Bilida, Almaty oblysy Ile aýdany №13 orta mektebiniń muǵalimi Gúlnár Kazerbaeva, «Eren eńbegi úshin» medalimen – Oral qalasy Á.Moldaǵulova atyndaǵy №38 mektep-litseiiniń muǵalimi Gúlzihan Taskarina, Túrkistan oblysy Kentaý qalasynyń A. Iýgnaki atyndaǵy orta mektebiniń muǵalimi Dánegúl Qýatbek, «Shapaǵat» medalimen – Qaraǵandy qalasyndaǵy N.Nurmaqov atyndaǵy №2 oblystyq mamandandyrylǵan mektep-internatynyń muǵalimi Ekaterina Niprýk marapattaldy.
Memleket basshysynyń baiandamasynyń tolyq nusqasyn myna jerden oqýǵa bolady.
