Elimizdiń Ortalyq sailaý komissiiasynda QR Prezidenttigine kandidattyń memlekettik tildi erkin meńgergenin anyqtaityn lingvistikalyq komissiia otyrysy ótip jatyr. Otyrysta prezidenttikke «Nur Otan» partiiasynyń atynan kandidat Qasym-Jomart Toqaev memlekettik tilden emtihan tapsyrýda, dep habarlaidy QazAqparat tilshisi.
Qasym-Jomart Toqaev aldymen «Abai Qunanbaiulynyń poeziiasy men qara sózderi» taqyrybynda 2 bettik shyǵarma jazady. Sodan keiin Sherhan Murtazanyń «Myńbulaq» kitabynan úzindini 15 minýt mánerlep oqidy. Al úshinshi kezeńde erkin taqyrypta sóz sóileidi.
Aita keteiik, 19 sáýirde QR Ortalyq sailaý komissiiasy QR Prezidentiniń kezekten tys sailaýynda QR Prezidenttigine kandidattardyń memlekettik tilde erkin meńgergenin anyqtaityn lingvistikalyq komissiia quryp, onyń quramyna Myrzatai Joldasbekov, Ádil Ahmetov, Ǵarifolla Esim, Serik Qasqabasov, Gúltas Qurmanbai, Erden Qajybek engen bolatyn.
Komissiia tóraǵasy Myrzatai Joldasbekovtiń aitýynsha, emtihan úsh kezeńnen quralǵan.
Birinshi kezeńde úmitker konvertte jasyrylǵan taqyryptardyń birine jazbasha jumys jazady. Jazbasha jumys 2 betten aspaýy kerek, ony jazýǵa 1 saǵat ýaqyt beriledi. Eger úmitker 1 saǵatta jazyp bitire almasa, komissiia aqyldasa kele, qosymsha jarty saǵat bere alady. Komissiia músheleri jumysty muqiiat tekseredi, árip qatesin, tynys belgilerin qadaǵalaidy. Máselen, 8 orfografiialyq qate tabylsa, eki qoiylady.
Ekinshi kezeńde úmitker komissiia usynǵan kólemi úsh betten aspaityn mátindi daýystap oqidy. Bul kezeńde úmitkerdiń daýys yrǵaǵy, oqý máneri baǵalanady. Úshinshi kezeńde úmitker lingvistikalyq komissiia bergen taqyryptardyń birine sóz sóileýi qajet. Onyń da taqyryptary konvertke salynyp, bekitilgen. Taqyryptar qazaq halqynyń tarihy, mádenieti, jetistikteri jóninde bolmaq. Úmitkerdiń sóz sóileýi komissiiany qanaǵattandyrmasa, taqyrypty tereńirek ashý úshin qosymsha suraqtar qoiylady.
