Búgin Parlament Senatynyń jalpy otyrysynda depýtattar quqyq qorǵaý organdarynan mal urlyǵyna tosqaýyl qoiýǵa qatysty qatań sharalar qabyldaýdy usyndy, dep habarlaidy QazAqparat.
«Búginde mal urlyǵy qoǵamdyq problemaǵa ainalǵany barshaǵa málim. Bul týraly óńirlerde bolǵan kezdesýlerde, buqaralyq aqparat quraldarynda únemi aitylyp júr», - dedi senator Ábdáli Nuraliev.
Óz kezeginde Parlament Senatynyń tóraǵasy Qasym-Jomart Toqaev shyn máninde bul taqyryp óte ózekti ekenin atap ótti.
«Osy oraida Ádilet ministrligi men ózge de múddeli organdarǵa mal urlyǵy máselesine erekshe nazar aýdarýdy suraimyn. Bul problemany mindetti túrde qarastyrý kerek. Qoǵamda osy másele boiynsha qyzý talqylaý bolyp jatyr. Sondyqtan is-sharalardy qatań túrde qoldanbasaq, bul ahýaldy túzetý qiynǵa túsedi», - dedi Q. Toqaev.
Senator Sársenbai Eńsegenovtiń sózine qaraǵanda, 2015-2017 jyldary elimizde 65 myńnan astam mal urlandy. Sonymen qatar ol buǵan deiin jiberilgen depýtattyq saýalda mal urlyǵyn bólek bapqa shyǵarý usynysy bolǵanyn eske saldy.
Aita keteiik, búgingi jalpy otyrysta «Qazaqstan Respýblikasynyń keibir zańnamalyq aktilerine menshik quqyǵyn qorǵaýdy kúsheitý, tórelik, sot júktemesin ońtailandyrý jáne qylmystyq zańnamany odan ári izgilendirý máseleleri boiynsha ózgerister men tolyqtyrýlar engizý týraly» zań jobasy qaraldy.
