Foto: Aqorda
Memleket basshysy Qasym-Jomart Toqaevtyń Qyzylorda oblysyna sapary «Qorqyt ata» halyqaralyq áýejaiynyń jańa terminalymen tanysýdan bastaldy, dep habarlaidy Ult.kz.
Prezidentke áýejai qyzmeti men ishki jáne halyqaralyq baǵyttardaǵy reisterdi qabyldaý jáne óńdeý úderisi tanystyryldy. Memleket basshysy jolaýshylardy tirkeý jáne tekserý aimaqtaryn, shekaralyq-kedendik baqylaý pýnktterin, kútý zalyn jáne avtomattandyrylǵan júk berý júiesin aralap kórdi.
Jańa terminal byltyr qarasha aiynda paidalanýǵa berilgen. Jobaǵa 16,6 milliard teńge jeke investitsiia tartylsa, jergilikti biýdjetten injenerlik-kommýnikatsiialyq infraqurylymǵa 4,3 milliard teńge bólingen. Nátijesinde áýejaidyń ótkizý qabileti jylyna 300 myńnan 500 myń jolaýshyǵa deiin artty.
Nysan Halyqaralyq azamattyq aviatsiia komiteti (ICAO) men Halyqaralyq áýe kóligi qaýymdastyǵynyń (IATA) standarttaryna tolyq sai keledi. Qazirgi tańda munda Air Astana, FlyArystan jáne Qazaq Air kompaniialary aptasyna 29 reis oryndaidy. Sondai-aq terminal janynda «Qazaeronavigatsiia» RMK jańa dispetcherlik munara men ákimshilik-tehnikalyq ǵimarat salyp jatyr. Bul joba óńirdiń kólik infraqurylymyn damytyp qana qoimai, Syr eliniń týristik jáne investitsiialyq áleýetin arttyrýǵa múmkindik beredi.
Oblystyń áleýmettik-ekonomikalyq damýy týraly esep berildi
Qyzylorda oblysynyń ákimi Nurlybek Nálibaev Memleket basshysyna óńirdiń áleýmettik-ekonomikalyq damýy týraly baiandady. Sońǵy tórt jylda aimaq ekonomikasyna tartylǵan investitsiia kólemi 233 paiyzǵa artqan. Biyl 720 milliard teńgeden astam qarjy tartý josparlanyp otyr, onyń 70 paiyzy – jeke investitsiia.
Ekonomikany ártaraptandyrý maqsatynda aldaǵy úsh jylda jalpy quny 2 trillion teńgege jýyq 90 joba júzege asyrylady. Bul 11 myńnan astam jańa jumys ornyn ashýǵa jol ashady. Biyldyń ózinde 302,5 milliard teńge bolatyn 27 nysandy iske qosý josparlanǵan, onyń toǵyzy qazirdiń ózinde paidalanýǵa berildi.
Prezident Qasym-Jomart Toqaev aimaqtyń damý qarqynyna oń baǵasyn berip, jumystardy jalǵastyrýdyń mańyzyn atap ótti.
Foto: Aqorda
Investitsiialyq jobalar tanystyryldy
Memleket basshysyna birqatar iri investitsiialyq jobalar tanystyryldy. Olardyń qatarynda Orient Ceramic KZO kompaniiasynyń qysh taqta óndiretin zaýyty, Fabe Agro jylyjai kesheni, qatty turmystyq qaldyqtardy óńdeitin With You kásiporny jáne Seven Rivers Technologies kompaniiasynyń shyny ydystar óndirisi bar.
Sonymen qatar Prezidentke shyny klasterin damytý, bý-gaz qondyrǵysy, taý-ken baiytý fabrikasy, kaltsiilendirilgen soda zaýyty jáne taýarly sút fermasy jobalarynyń iske asý jospary jóninde baiandaldy.
Qasym-Jomart Toqaev bul jobalardy sapaly ári ýaqtyly júzege asyrýdyń mańyzdylyǵyn atap ótip, oblys ákimdigine investitsiialyq klimatty jaqsartý jáne bizneske qolaily jaǵdai jasaý jónindegi jumysty jalǵastyrýdy tapsyrdy.
Foto: Aqorda
Prezident Óner ortalyǵynda boldy
Sapar sońynda Memleket basshysy oblys ortalyǵyndaǵy Óner ortalyǵyn aralap kórdi. Myń orynǵa arnalǵan zamanaýi keshenniń qurylysyna 3,7 milliard teńge jumsalǵan. Munda kontsertter, shyǵarmashylyq keshter men túrli qoǵamdyq is-sharalar ótkiziledi.
Qasym-Jomart Toqaev kórermen zalyn aralap, oblystyq simfoniialyq orkestrdiń daiyndyǵyn tamashalady. Prezidentke sońǵy úsh jylda óńirde 18 mádeniet nysanynyń salynǵany týraly málimet berildi. Olardyń ishinde 7 «Rýhaniiat» ortalyǵy, mýzykalyq kolledjdiń jańa ǵimaraty, tarihi-ólketaný mýzeii jáne aýyldyq mádeniet úileri bar.
Memleket basshysy mádeniet salasyndaǵy mamandardy qoldaý, turǵyn úimen qamtý jáne shyǵarmashylyq ujymdardyń áleýetin arttyrý baǵytyndaǵy jumystardy jalǵastyrýdyń mańyzyn atap ótti.
