Foto: QR OAM
Memleket basshysy Barselona qalasynda ótken halyqaralyq STEM olimpiadasynda, sondai-aq Birikken Arab Ámirlikterinde uiymdastyrylǵan himiia páninen halyqaralyq olimpiadada jeńiske jetken qazaqstandyq oqýshylarǵa quttyqtaý jedelhatyn joldady, dep habarlaidy Ult.kz.
Qasym-Jomart Toqaev muny elimizdiń abyroi-bedelin arttyra túsetin tarihi jetistik retinde baǵalady.
"Bul – Qazaqstanda bilim berý salasy qarqyndy damyp kele jatqanynyń aiqyn dáleli. Memleket jastardyń sapaly bilim, taǵylymdy tárbie alýyna árdaiym basa mán beredi. Elimiz sizderdi maqtan tutady. Jarqyn jeńisterińiz kóp bolsyn!" – dep jazdy Prezident.
Aita keteiik, halyqaralyq himiia olimpiadasynda (International Chemistry Olympiad, IChO-2025) elimizdiń atynan qatysqan tórt oqýshynyń bári júldege ie boldy, onyń ekeýi – altyn medal.
Olimpiada 5-14 shilde aralyǵynda Birikken Arab Ámirlikterinde ótti. Álemniń 93 elinen 360-tan astam oqýshy qatysqan bul ziiatkerlik dodada Qazaqstan ulttyq quramasyndaǵy tórt oqýshy tamasha nátije kórsetip, elimizdiń jas himikteriniń kóshbasshylyq mártebesin taǵy bir márte dáleldedi.
- Kirill Kim — Astana qalasyndaǵy Nazarbaev Ziiatkerlik mektebiniń 12-synyp oqýshysy;
- Abylai Kabdýlhadyr — Astana qalasyndaǵy Nazarbaev Ziiatkerlik mektebiniń 12-synyp oqýshysy;
- Eńlik Baqytbekova — Almaty qalasyndaǵy Nazarbaev Ziiatkerlik mektebiniń 12-synyp oqýshysy;
- Ańsar Jaqsylyqov — Aqtóbe oblysyndaǵy «Bilim-innovatsiia» litseiiniń 10-synyp oqýshysy.
Ulttyq quramaǵa ǵylymi jetekshilik etken:
- Sanjar Begdair – Korea Advanced Institute of Science and Technology (KAIST) magistranty, halyqaralyq jáne respýblikalyq olimpiadalardyń jeńimpazy;
- Rinat Iliýsizov – birneshe márte halyqaralyq jáne respýblikalyq olimpiada jeńimpazy.
Oqý-aǵartý ministri Ǵani Beisembaev bizdiń oqýshylarymyzdyń jetistigi - qazaqstandyq bilimdiń álemdegi biik mártebesin taǵy bir márte dáleldegenin atap ótti.
Bul Olimpiada álemdegi eń bedeldi jeti halyqaralyq olimpiadalardyń qataryna enedi. Qazaqstan Respýblikasy Prezidentiniń tapsyrmasy negizinde altyn medal úshin – 1 500 AEK, kúmis medal úshin – 1 000 AEK, qola medal úshin – 500 AEK kóleminde aqshalai syiaqy qarastyrylǵan. Jetekshi ustazdarǵa da yntalandyrý tólemderi kózdelgen. Eske salsaq, byltyr IChO-2024 olimpiadasynda qazaqstandyq oqýshylar 2 altyn, 1 kúmis jáne 1 qola medal jeńip alǵan bolatyn.
