Foto: Akorda.kz
Qazaqstan men Tájikstan prezidentteri shaǵyn quramda kelissóz júrgizdi, dep habarlaidy "Ult aqparat" Aqordaǵa silteme jasap.
Memleket basshysy Qasym-Jomart Toqaev Qazaqstanǵa memlekettik saparmen kelgen Tájikstan Prezidenti Emomali Rahmonmen kezdesý ótkizdi.
Kelissózge deiin «Aqorda» rezidentsiiasynda resmi qarsy alý rásimi boldy. Qasym-Jomart Toqaev pen Emomali Rahmon bir-birine resmi delegatsiia múshelerin tanystyrdy. Qurmet qaraýylynyń bastyǵy eki el basshylaryna raport berip, Qazaqstan men Tájikstannyń memlekettik ánurandary shyrqaldy. Budan keiin eki el basshylary shaǵyn quramda kezdesý ótkizdi.
Qasym-Jomart Toqaev Emomali Rahmonǵa iltipat bildire otyryp, Tájikstan Qazaqstannyń senimdi strategiialyq seriktesi, sondai-aq baýyrlas ári jaqyn memleket ekenin atap ótti.
– Bizdi ejelden ortaq tarih, mádeni jáne rýhani qundylyqtar tyǵyz bailanystyrady. Eki el arasyndaǵy diplomatiialyq qarym-qatynastardyń 30 jyldyǵynda Odaqtastyq ózara is-qimyl týraly deklaratsiiaǵa qol qoiyp otyrmyz. Munyń simvoldyq máni bar. Bul qujat óte mańyzdy ári bolashaqqa arnalǵan. Sondai-aq bizdiń memleketterimizdiń ulttyq múddelerine tolyq sai keledi. Bul baǵytta aramyzda eshqandai kúmándi másele joq. Qazaqstan men Tájikstan saýda-ekonomikalyq yntymaqtastyqty belsendi damytyp keledi. Uzaq jyldardan beri Qazaqstan – Tájikstannyń ekinshi iri saýda seriktesi. Tek byltyrdyń ózinde ekijaqty saýda ainalymy 18,5 paiyzǵa artyp, 1,4 milliard dollarǵa jetti. Qazirgi jaǵdaida bul – jaqsy nátije. Ónerkásip, aýyl sharýashylyǵy, kólik jáne basqa da salalardaǵy birqatar ekonomikalyq joba júzege asyrylý satysynda tur. Sizdiń saparyńyz aiasynda ekonomikanyń túrli sektoryndaǵy ózara is-áreketti odan ári keńeitýge baǵyttalǵan jańa kelisimderdiń mańyzdy toptamasyna qol qoiylady, – dedi Prezident.
Kelissóz barysynda qazaq-tájik yntymaqtastyǵyn odan ári damytý perspektivalary talqylandy. Sondai-aq saýda-ekonomikalyq, sonyń ishinde ónerkásip, aýyl sharýashylyǵy jáne kólik salalaryndaǵy yntymaqtastyqty keńeitýge erekshe nazar aýdaryldy.
– Keshe elderimiz arasyndaǵy yntymaqtastyqtyń perspektivalaryna qatysty beiresmi ári ózara senimge negizdelgen jaǵdaida pikir almastyq. Eń bastysy, saýda kólemin eki milliard dollarǵa deiin arttyrýǵa múmkindik bar. Biz biznesmenderdiń 1,8 milliard dollar kólemindegi kelisimsharttarǵa qol qoiǵanyna kóńilimiz tolatynyn atap óttik. Bul – óte jaqsy nátije. Eki el úkimetteri osy kelisimsharttardyń oryndalýyn muqiiat qadaǵalap otyrýǵa tiis. Bizdiń berik ári uzaqmerzimdi qarym-qatynasymyzdyń myzǵymas negizi – tyǵyz mádeni-gýmanitarlyq bailanystar. Byltyr Dýshanbede Qazaqstan kinosy kúnderi tabysty ótkizildi. Biyl bizdiń elimizde Tájikstannyń mádeniet kúnderin ótkizý josparlanyp otyr. Biz osy sharaǵa muqiiat daiyndalýymyz kerek, – dedi Memleket basshysy.
Emomali Rahmon Qazaqstanǵa shaqyrǵany jáne qonaqjailyq kórsetkeni úshin Qasym-Jomart Toqaevqa alǵys aitty.
– Tájikstan men Qazaqstan – strategiialyq seriktester. Qarym-qatynasymyz turaqty túrde damyp keledi. Biz ony odan ári nyǵaitýǵa basa mán beremiz. Qazaqstan búginde basty saýda seriktesterimizdiń arasynda ekinshi orynda. Byltyr taýar ainalymynyń ósimi 20 paiyzdan asty. Biz basqa salalarda da qarqyndy dialog júrgizemiz. Sizben elderimizdiń áleýmettik-ekonomikalyq damý perspektivalaryn, sondai-aq halyqaralyq jáne óńirlik máselelerdi talqylaýǵa daiynmyn. Sizdi jáne barsha Qazaqstan halqyn Parlament sailaýynyń sátti ótýimen quttyqtaimyn. Sizge aldaǵy ýaqytta baýyrlas Qazaqstannyń damýyna baǵyttalǵan reformalardy júzege asyrýda tabys tileimin. Biz turaqty bailanystar men joǵary deńgeidegi uzaqmerzimdi saiasi dialogtyń igi dástúrlerin saqtap, odan ári keńeitemiz. Men dostyq qarym-qatynasymyzdy joǵary baǵalaimyn, – dedi Tájikstan Prezidenti.
