Memleket basshysy Katar Ortalyq bankiniń tóraǵasy Abdalla Ál Tani bastaǵan iri qarjy qurylymdarynyń basshylarymen kezdesti, – dep habarlaidy Aqordanyń baspasóz qyzmeti.
Qazaqstan Prezidenti Katar delegatsiiasynyń osy sapary ózara yntymaqtastyqty damytýǵa tyń serpin berýi tiis ekenin atap ótti.
– Biylǵy maýsym aiynda Dýshanbede Katar Ámirimen kezdestim. Sol kezde biz eki memleket arasynda dáneker bolatyn naqty is-qimyldardy kúsheitý jóninde ýaǵdalastyq. Men ony Qazaqstan astanasyna resmi saparmen kelýge shaqyrdym. Osyǵan bailanysty sizderdiń saparlaryńyzdyń biz úshin mańyzy asa zor dep oilaimyn, – dedi Memleket basshysy.
Katar Ortalyq bankiniń tóraǵasy Abdalla Ál Tani óz eliniń basshylyǵynyń Prezidentke, Úkimetke jáne Qazaqstan halqyna joldaǵan sálemin jetkizdi.
– Eki el arasyndaǵy qarym-qatynastardyń joǵary deńgeide damyp kele jatqanyn bilesizder. Bizdiń saparymyz osy úrdiske qoldaý kórsetý bolyp sanalady. Elderimizdiń qarjylyq qurylymdary arasynda tereń ári tyǵyz bailanystar ornaǵan. Biz bir-birimizben bank, qarjy jáne investitsiia baǵyttary boiynsha yqpaldastyq jasap kelemiz. Keshe «Astana» halyqaralyq qarjy ortalyǵynyń bazasynda Katardaǵy iri bankterdiń biriniń filialyn ashý jóninde ýaǵdalastyq, – dedi Katar qarjygeri.
Sonymen qatar ol eki el arasyndaǵy tikelei áýe qatynasynyń tezirek ashylýy saýda-ekonomikalyq jáne investitsiialyq yntymaqtastyqty nyǵaita túsedi degen pikir aitty. Delegatsiia quramynda Katar Qor birjasynyń basqarma tóraǵasy Rashid ál-Mansýri, «Masraf Al Rayan» bankter tobynyń tóraǵasy Hýsein ál-Abdalla, «Qatar International Islamic Bank» bankiniń basqarma tóraǵasy Abdýl Basit ál-Shaibi, Qatar National Bank» bankiniń basqarma tóraǵasynyń mindetin atqarýshy Abdýlla ál-Halifa, Katar qarjy ortalyǵynyń Retteýshi vedomstvosynyń basqarma tóraǵasy Maikl Raian, «Commercial Bank of Qatar» bankter tobynyń basqarma múshesi Mohamad Mandani ál-Emadi jáne Katardyń Qazaqstandaǵy elshisi Abdýlaziz ál-Rýmeihi boldy.
