Prezident Qasym-Jomart Toqaev Qatar Memleketiniń Ámiri sheih Tamim ben Hamad Ál Tanimen telefon arqyly sóilesti, dep habarlaidy "Ult aqparat" Aqordanyń resmi saityna silteme jasap.
Memleket basshylary Máýlit merekesine orai quttyqtaýlarmen almasyp, eki el yntymaqtastyǵynyń qazirgi jaǵdaiy men ony damytýdyń naqty joldary boiynsha pikirlesti.
Qasym-Jomart Toqaev pen sheih Tamim ben Hamad Ál Tani búgingi tańda koronavirýs pandemiiasy halyqaralyq qaýymdastyq músheleri arasyndaǵy tolyqqandy qarym-qatynastardy aitarlyqtai shektep otyrǵanyna qaramastan, Qazaqstan men Qatardyń yntymaqtastyǵy qarqyndy damyp kele jatqanyn erekshe atap ótti.
Qazaqstan Prezidenti Qatar Ámirine COVID-19 indetine qarsy kúreste elimizge qajetti qural-jabdyqtar túrinde kórsetilgen gýmanitarlyq kómek úshin alǵysyn bildirip, bul qadamdy shynaiy dostyqtyń kórinisi dep baǵalaitynyn aitty.
Álemde qalyptasqan kúrdeli jaǵdai kezinde de taraptar ekijaqty saýda-ekonomikalyq jáne investitsiialyq bailanystardy ári qarai óristetýge múddelilikterin qýattady. Osy rette, memleket basshylary 2019 jyly joǵary deńgeide qol jetkizilgen ýaǵdalastyqtarǵa sáikes, eki el arasyndaǵy bank, qarjy, kólik, logistika, energetika, aýyl sharýashylyǵy, týrizm salalary men basqa da baǵyttar boiynsha aýqymdy jobalardy júzege asyrýǵa qatysty is-qimyldardy keńeitý joldaryn talqylady. Atalǵan maqsatta Qasym-Jomart Toqaev pen sheih Tamim ben Hamad Ál Tani resmi jáne biznes delegatsiialarmen almasýǵa qoldaý kórsetýge kelisti.
Suhbatty qorytyndylai kele, sheih Tamim ben Hamad Ál Tani Qasym-Jomart Toqaevtyń kelesi jyly Qazaqstanǵa saparmen kelý jónindegi shaqyrýyn qabyl aldy.
