Qazaqstan Prezidenti Qasym-Jomart Toqaev Iran Prezidenti Hasan Rýhanimen telefon arqyly sóilesti, dep habarlaidy Aqorda.
Taraptar qazaq-iran qatynastarynyń qazirgi ahýaly men damý perspektivalaryn, sonyń ishinde saýda-ekonomikalyq yntymaqtastyqty nyǵaitý máselelerin talqylady.
Hasan Rýhani Iran tarapynyń Qazaqstanmen taýar ainalymyn arttyrýǵa múddeli ekenin atap ótip, «Qazaqstan-Túrikmenstan-Iran» temir jolynyń, sondai-aq, Kaspii teńizi arqyly ótetin mýltimodaldi dálizderdiń áleýetin tiimdi paidalanýdyń ózektiligine toqtaldy.
Osy oraida Iran tarapy júk tasymalyn ulǵaitý maqsatynda atalǵan kólik baǵyttarynyń básekege qabilettiligin arttyrý úshin birlesken jumystardyń mańyzdy ekenin jetkizdi.
Qasym-Jomart Toqaev ekijaqty ekonomikalyq bailanystardy jandandyrýdyń naqty sharalaryn úkimetter deńgeiinde ázirleýdi usyndy.
Memleketterdiń COVID-19 indetine qarsy kúreske qatysty qabyldaǵan sharalaryna erekshe nazar aýdaryldy.
Iran Prezidenti indettiń taralýyn boldyrmaý jónindegi Qazaqstan basshylyǵynyń qabyldaǵan sheshimderi men atqarǵan is-qimyldaryn, sondai-aq, halyq arasynda keń aýqymda júrgizilgen koronavirýsty anyqtaý jumystaryn joǵary baǵalady.
Áńgime sońynda Hasan Rýhani Qasym-Jomart Toqaevty Tegeranǵa resmi saparmen kelýge shaqyrdy.
