قازاقستان پرەزيدەنتٸ قاسىم-جومارت توقاەۆ يران پرەزيدەنتٸ حاسان رۋحانيمەن تەلەفون ارقىلى سٶيلەستٸ, دەپ حابارلايدى اقوردا.
تاراپتار قازاق-يران قاتىناستارىنىڭ قازٸرگٸ احۋالى مەن دامۋ پەرسپەكتيۆالارىن, سونىڭ ٸشٸندە ساۋدا-ەكونوميكالىق ىنتىماقتاستىقتى نىعايتۋ مەسەلەلەرٸن تالقىلادى.
حاسان رۋحاني يران تاراپىنىڭ قازاقستانمەن تاۋار اينالىمىن ارتتىرۋعا مٷددەلٸ ەكەنٸن اتاپ ٶتٸپ, «قازاقستان-تٷرٸكمەنستان-يران» تەمٸر جولىنىڭ, سونداي-اق, كاسپيي تەڭٸزٸ ارقىلى ٶتەتٸن مۋلتيمودالدٸ دەلٸزدەردٸڭ ەلەۋەتٸن تيٸمدٸ پايدالانۋدىڭ ٶزەكتٸلٸگٸنە توقتالدى.
وسى ورايدا يران تاراپى جٷك تاسىمالىن ۇلعايتۋ ماقساتىندا اتالعان كٶلٸك باعىتتارىنىڭ بەسەكەگە قابٸلەتتٸلٸگٸن ارتتىرۋ ٷشٸن بٸرلەسكەن جۇمىستاردىڭ ماڭىزدى ەكەنٸن جەتكٸزدٸ.
قاسىم-جومارت توقاەۆ ەكٸجاقتى ەكونوميكالىق بايلانىستاردى جانداندىرۋدىڭ ناقتى شارالارىن ٷكٸمەتتەر دەڭگەيٸندە ەزٸرلەۋدٸ ۇسىندى.
مەملەكەتتەردٸڭ COVID-19 ٸندەتٸنە قارسى كٷرەسكە قاتىستى قابىلداعان شارالارىنا ەرەكشە نازار اۋدارىلدى.
يران پرەزيدەنتٸ ٸندەتتٸڭ تارالۋىن بولدىرماۋ جٶنٸندەگٸ قازاقستان باسشىلىعىنىڭ قابىلداعان شەشٸمدەرٸ مەن اتقارعان ٸس-قيمىلدارىن, سونداي-اق, حالىق اراسىندا كەڭ اۋقىمدا جٷرگٸزٸلگەن كوروناۆيرۋستى انىقتاۋ جۇمىستارىن جوعارى باعالادى.
ەڭگٸمە سوڭىندا حاسان رۋحاني قاسىم-جومارت توقاەۆتى تەگەرانعا رەسمي ساپارمەن كەلۋگە شاقىردى.
