Qazaqstan Prezidenti Qasym-Jomart Toqaev «Polimetall» kompaniiasy direktorlar keńesiniń múshesi Igor Finogenovti qabyldady, dep habarlaidy "Ult aqparat" Aqordaǵa silteme jasap.
Memleket basshysyna «Polimetall» kásipornynyń Qazaqstan men Resei naryǵynda júzege asyrylyp jatqan iri jobalary týraly málimet berildi.
Qazaqstan Prezidenti «Polimetall» kásipornynyń «Astana» halyqaralyq qarjy ortalyǵynyń birjasyna enýimen quttyqtap, kompaniianyń bizdiń eldegi jumysyna toqtaldy.
– «Polimetall» «Astana» halyqaralyq qarjy ortalyǵynyń birjasynda ornalasqan alǵashqy sheteldik kompaniia atanýymen quttyqtaimyn jáne rizashylyǵymdy bildiremin. Sizder Shyǵys Qazaqstan oblysyndaǵy Baqyrshyq ken ornynda «Qyzyl» jobasyn tabysty aiaqtadyńyzdar. Qostanai oblysyndaǵy altyn ken ornynda da jobalar júzege asyrylyp jatyrsyzdar, – dedi Qasym-Jomart Toqaev.
Igor Finogenov «Astana» HQO sheteldik kompaniialarǵa Qazaqstanda jumys isteýge úlken investitsiialyq múmkindikter jasap otyrǵanyn atap ótti.
– «Astana» halyqaralyq qarjy ortalyǵynyń birjasyna enýimizdi úlken jetistik dep sanaimyz. Óitkeni, bul Qazaqstanda qarjylyq jobalardy júzege asyrýǵa baǵyttalǵan alǵashqy qadamdarymyz. Biz geologiialyq barlaý jumystaryna investitsiia salýǵa múddelimiz, al birja bul úshin jaqsy múmkindik, – dedi Igor Finogenov.
Kezdesý sońynda taraptar yntymaqtastyqtyń aldaǵy ýaqytta da arta beretinine senim bildirdi.
