Foto: Aqorda
Memleket basshysy World Boxing prezidenti Gennadii Golovkindi qabyldady, dep habarlaidy Ult.kz.
Qasym-Jomart Toqaev Gennadii Golovkindi World Boxing halyqaralyq federatsiiasynyń prezidenti bolyp sailanýymen quttyqtady. Bul sheshimdi dańqty sportshynyń álemdik boksty damytýǵa qosqan úlesiniń, kásibiligi men minsiz abyroi-bedeliniń moiyndalǵany dep baǵalady.
– Siz álemdik sporttyń damýyna zor úles qostyńyz. Qazaq boks mektebiniń bai dástúrin laiyqty deńgeide tanytyp, dúnie júziniń elimizdi boks derjavasy retinde moiyndaýyna yqpal ettińiz. Ómir jolyńyz kóptegen jarqyn jeńiske toly. Oǵan kúsh-qýat, rýh, tabandylyq, ishki tártip sekildi qasietterińiz arqyly jettińiz. Bul elimizde ǵana emes, shet memleketterdegi milliondaǵan jastyń jigerin janidy. Esimińiz álemdik boks tarihyna altyn árippen jazylǵanyna esh kúmán joq, – dedi Prezident.
Memleket basshysy tanymal sportshynyń Ulttyq olimpiada komitetindegi qyzmetine joǵary baǵa berdi.
– Sizdiń basqarý salasyndaǵy jetistikterińizdi airyqsha atap ótkim keledi. Sporttaǵy eńbegińizdi eskere otyryp, Sizdi Ulttyq olimpiada komiteti prezidenttigine úmitker retinde usyndym. Ulttyq sport federatsiialarynyń barlyǵymen bailanys ornatyp, az ýaqytta kóp is tyndyrǵanyńyz úshin rizashylyǵymyzdy bildiremiz. Halyqaralyq Olimpiada komitetimen yntymaqtastyqty jolǵa qoidyńyz, – dedi Memleket basshysy.
Qasym-Jomart Toqaev Gennadii Golovkinge World Boxing halyqaralyq federatsiiasynyń prezidenti retinde kóptegen máseleniń sheshimin tabýy qajet ekenin aitty.
– Búginde sporttyq mansabyńyzdaǵy jańa kezeńge aiaq bastyńyz. World Boxing federatsiiasynyń prezidenti bolyp sailandyńyz. Jumys endi ǵana bastaldy. Aldyńyzda atqaratyn qyrýar sharýa tur. Sondai-aq Sizdiń jahandyq deńgeidegi sporttyq qurylymdy basqaryp otyrǵan alǵashqy qazaqstandyq ekenińizdi aita ketý kerek. Kásibi biliktiligińiz uiymdy jańa beleske kóterip, boks kókjiegin keńeitetinine senimdimin, – dedi Prezident.
Memleket basshysy otandyq sportty damytýǵa sińirgen eleýli eńbegi úshin Gennadii Golovkindi I dárejeli «Barys» ordenimen marapattady.
Gennadii Golovkin eńbegin joǵary baǵalaǵany, senim artyp, qoldaý kórsetkeni úshin Prezident Qasym-Jomart Toqaevqa alǵys aitty. Sondai-aq boksty odan ári damytýǵa, osy sport túriniń elimizdegi jáne halyqaralyq deńgeidegi bedelin nyǵaitýǵa daiyn ekenin jetkizdi.
