Parlament Senatynyń Tóraǵasy Qasym-Jomart Toqaev Finliandiianyń syrtqy saýda jáne damý ministri, Qazaqstan men Finliandiianyń saýda-ekonomikalyq yntymaqtastyq jónindegi úkimetaralyq komissiiasynyń teń tóraǵasy Anne-Mari A.Virolainendi qabyldady, dep habarlaidy "Ult aqparat" Senattyń baspasóz qyzmetine silteme jasap.
Tóraǵa joǵary deńgeidegi júieli saiasi únqatysýǵa negizdelgen Qazaqstan-Finliandiia qatynastarynyń erekshe sipatyna toqtaldy. Q.Toqaev Memleket basshysy N.Nazarbaevtyń 2018 jyly Helsinkige saparynyń nátijeli bolǵanyn jáne onda kóptegen ekijaqty kelisimderge qol qoiylǵanyn atap ótti.
Parlament joǵarǵy Palatasynyń basshysy Senattyń ózara parlamentaralyq is-qimyldy tereńdetýge múddeli ekenin atap ótip, fin depýtattaryn Qazaqstanǵa saparlap kelýge shaqyrdy.
Anna Mari Virolainen Q.Toqaevty Saýda-ekonomikalyq yntymaqtastyq jónindegi úkimetaralyq komissiianyń 11-shi otyrysynyń qorytyndysy týraly habardar etti. Onyń pikirinshe, kólik, logistika, energetika, tsifrlandyrý jáne bilim berý salalary ózara tiimdi yntymaqtastyqtyń basym baǵyttary bolyp tabylady. «Qazaqstan - Ortalyq Aziiadaǵy qozǵaýshy kúsh bolyp otyr. Kóptegen fin kompaniialary óz tájiribesimen bólisýge daiyn», - dedi Finliandiia syrtqy saýda jáne damý ministri.
Q.Toqaev fin eliniń bilim berý júiesiniń tiimdiligin aita kelip, álemniń bilim berý keńistigine keńinen tanylǵan tájiribeni zerdeleýge Qazaqstannyń múddeli ekenine toqtaldy.
«Finderdiń zań shyǵarýdy júzege asyrý, sondai-aq quqyq ústemdigin qamtamasyz etý, sybailas jemqorlyqqa qarsy kúres, jalpyǵa birdei igilikti qoǵam qurý úlgisin iske asyrý tájiribesi biz úshin zor yqylas týǵyzady», - dedi Senat Tóraǵasy.
Parlament joǵarǵy Palatasynyń Tóraǵasy Memleket basshysy Nursultan Nazarbaevtyń áleýmettik qoldaýdy kúsheitý jáne qazaqstandyqtardyń ómir súrý sapasyn jaqsartý jónindegi «Nur Otan» partiiasynyń XVIII sezindegi asa mańyzdy bastamalary týraly aityp berdi.
