Qazaqstan Respýblikasynyń Prezidenti Qasym-Jomart Toqaev eldiń jinalýyna qatysty sóz qozǵalatyn bolsa, onyń barlyǵy ruqsatpen bolýy kerektigin eskertti. Osy máselege qatysty videony Facebook paraqshasynda Prezidenttiń baspasóz hatshysy Berik Ýáli jariialady, dep habarlaidy "Ult aqparat".
«Meniń túsinigimdegi ádilet - zańnyń saltanat qurýy. Memlekettik sheneýnikter de, quqyq qorǵaý organdarynyń qyzmetkerleri de - barlyǵy zańǵa baǵynýy kerek. Sondai-aq, zańdy el azamattary da saqtaýy tiis. Zań bárine birdei. Qandai da bir syn aitý da zań aiasynda bolýy tiis. Adamdardyń jinalýyna qatysty aitar bolsaq, ol da ruqsatpen bolýy shart. Sondyqtan, men bizdiń elde zańdardyń saqtalatynyn qatań eskertemin», - deidi Qasym-Jomart Toqaev.
Aita ketsek, búgin QR Bas prokýrorynyń orynbasary Bolat Dembaev «Prokýratýra týraly» Zańnyń 31-babynyń tártibinde úndeý jariialaǵan bolatyn.
«Áleýmettik jeliler men messendjerlerde 9 mamyrda zańsyz mitingke qatysýǵa úgitteý júrip jatyr. Bas prokýratýra budan buryn osyndai zańsyz jariialy aktsiialar uiymdastyrǵan jáne qatysqandar jaýapqa tartylatynyn eskertken bolatyn. Alaida 1 mamyrda keibir azamattar ýákiletti memlekettik organdar qyzmetkerleri eskertýin elemei, zańsyz mitingilerge shyǵyp, ákimshilik jaýapqa tartyldy. Olardyń quqyqtyq tártipke qaishy is-áreketterinen azamattardyń demalýyna jáne tynyshtyǵyna qaýip tóndi», - delingen úndeýde.
