Memleket basshysy Sortóbe aýylyndaǵy mádeniet úiinde dúngen diasporasynyń ókilderimen kezdesý ótkizdi, dep habarlaidy "Ult aqparat" Aqordaǵa silteme jasap.
Prezident Qazaqstandy dostyqtyń, beibitshilik pen kelisimniń, sondai-aq, barlyq etnikalyq toptardyń ortaq otany bolyp sanalatynyn atap ótti. Elimiz túrli tarihi jaǵdailarǵa bailanysty, qiyn-qystaý zamanda májbúrli túrde qazaq jerin panalap kelgen halyqtyń bárin qushaq jaia qarsy alǵanyn aitty. Memleket basshysy Qordai aýdanynda bolǵan oqiǵadan durys qorytyndy shyǵarý kerek ekenin málimdedi.
– Bolǵan qaiǵyly oqiǵa artta qalýy tiis. Aldaǵy ýaqytta tatý-tátti, túsinistikte birge ómir súremiz. Biz budan sabaq alýymyz kerek. Buryn-sońdy mundai jaǵdai bolǵan emes. Bul biliktiń de jibergen kemshiligi. Sondyqtan men birden oblys basshylyǵyn, sonyń ishinde quqyq qorǵaý organdarynyń jetekshilerin de aýystyrdym, – dedi Memleket basshysy.
Qasym-Jomart Toqaev Berdibek Saparbaev tóraǵalyq etetin Úkimettik komissiia barlyq nysandardy qaita qalpyna keltirip, áleýmettik máselelerdi sheshýmen ainalysatynyn aitty. Aimaqtaǵy ahýal jiti baqylaýda bolady.
Prezident dúngen diasporasynyń ókilderin jastardyń tárbiesine basa mán berip, olardy árbir halyqtyń mádenietine, qazaq tili men Qazaqstannyń memlekettik rámizderine qurmetpen qaraýǵa shaqyrdy.
– Sizderdiń balalaryńyz qazaq tilin úirenýi kerek. Sondai-aq orys tili men óziniń ana tilin de bilýi qajet. Memleket sizderdiń mádenietterińiz ben dástúrlerińizdi saqtap, damytýǵa jan-jaqty qoldaý kórsetedi. Degenmen sizder, ásirese, aýylda turatyn azamattar memlekettik tildi bilgenderińiz asa mańyzdy, – dedi Memleket basshysy.
Sonymen qatar Prezident jastardyń Qordai aýdanyndaǵy birneshe aýylda ǵana emes, Qazaqstannyń barlyq óńirinde jumys isteýine mol múmkindik bar ekenin jetkizdi.
– Qazaqstan – baitaq ári bai memleket. Elimizdiń soltústiginde qunarly jerler bar. Biz nege bir jerde ǵana turaqtaýymyz kerek? Balalaryńyzdy soltústikke, shyǵysqa qarai jiberińizder. Soltústik, batys, ońtústik, shyǵysta sizderdiń balalaryńyzǵa jumys istep, aqsha tabýǵa múmkindik mol, – dedi Qasym-Jomart Toqaev.
Memleket basshysy jurtshylyqty qaiǵyly oqiǵanyń qaitalanýyna jol bermeýge shaqyrdy. Óńirdegi quqyq qorǵaý organdarynyń jańa basshylyǵyna qoǵamdyq tártip pen turǵyndardyń qaýipsizdigin qamtamasyz etý, sondai-aq, qylmystyń aldyn alý jóninde mindet júktedi.
Kezdesýde Qordai aýdanynyń Qurmetti azamaty Shisyr Dinlason kezinde qamqorlyq kórsetken qazaq halqyna qonaqjailylyǵy men meiirimi úshin alǵys bildirdi. Eńbek ardageri jergilikti dúngenderdiń bolǵan oqiǵaǵa ókinish bildirip, keshirim suraitynyn aitty. Sortóbe aýyldyq mektebiniń qazaq tili men ádebieti pániniń muǵalimi Edik Sýlarov jergilikti balalarǵa memlekettik tildi, Qazaqstan tarihyn, qazaq halqynyń salt-dástúrin oqytýǵa nietti ekenin jetkizdi.
Kezdesý sońynda Qazaqstan Prezidenti Qarakemer, Masanshy jáne Sortóbe aýyldaryndaǵy qoǵamdyq tártipti qamtamasyz etetin Arnaiy jedel áreket etý jasaǵynyń jaýyngerlerimen, Ulttyq gvardiianyń áskeri qyzmetshilerimen áńgimelesti.
