Qasym-Jomart Toqaev Shyǵys Qazaqstan oblysynyń ákimi Danial Ahmetovti qabyldady, dep habarlaidy Aqordanyń baspasóz qyzmeti.
Oblys ákimi Memleket basshysyna aimaqtyń 2019 jylǵy áleýmettik-ekonomikalyq damý qorytyndylary, sondai-aq óńirdiń áleýetin odan ári nyǵaitý jónindegi jospary týraly baiandady.
Danial Ahmetovtyń aitýynsha, Shyǵys Qazaqstan oblysynda investitsiia kólemi artqan, ónerkásip jáne aýyl sharýashylyǵy óndirisiniń ósýi baiqalady.
Oblys ákimi Prezidentke ataýly áleýmettik kómek berýdiń jańa formatyn iske asý barysy jaiynda málimet berdi. Qasym-Jomart Toqaev oblysta turatyn árbir az qamtylǵan otbasynyń jaǵdaiyna muqiiat taldaý jasap, olarǵa kómek kórsetý jóninde tiisti sharalar qabyldaýdy tapsyrdy. Kóp balaly otbasylarǵa qatysty da osyndai tapsyrma berildi.
Sonymen qatar Danial Ahmetov Memleket basshysyna osy jyldyń ekinshi jartyjyldyǵynda Buqtyrma sý qoimasy arqyly ótetin kópirdiń qurylysy bastalatynyn habarlady. Prezident bul nysannyń áleýmettik turǵydan asa mańyzdy ekenin atap ótip, kópir qurylysy aimaq halqynyń edáýir bóligin jol taýqymetinen aryltatynyn aitty.
Qasym-Jomart Toqaev Danial Ahmetovke Abaidyń 175 jyldyǵyn ótkizýge, sonyń ishinde, Jidebaidaǵy murajai men qonaq úi kesheniniń qurylysyna qatysty birqatar naqty tapsyrma berdi.
Memleket basshysy ákimniń óńirdi áleýmettik-ekonomikalyq damytý jónindegi jumysyna oń baǵa berip, Shyǵys Qazaqstan oblysynyń ǵylym-bilim jáne meditsinalyq áleýetin arttyrýǵa baǵyttalǵan bastamalaryn atap ótti.
