Foto: Aqorda
Qasym-Jomart Toqaev ekinshi «Ortalyq Aziia – Resei» sammitine qatysty, dep habarlaidy Ult.kz.
Prezident aimaq pen Resei arasyndaǵy ekijaqty jáne kópjaqty yqpaldastyqtyń birqatar ózekti baǵytyna qatysty oiymen bólisti. Birinshi basymdyq retinde saýda jáne indýstrialdy qarym-qatynasty damytýǵa toqtaldy.
– Alǵashqy sammitte ekonomikalyq yntymaqtastyqtyń jańa úlgisin qalyptastyrý baǵytynda jumys isteýge kelisken edik. Búgin qabyldanatyn Birlesken is-qimyl jospary 50-den asa sharany qamtidy. Bul – óte qundy qujat. Sol sebepti ony ýaqtyly iske asyrýǵa barynsha kúsh jumyldyrý qajet. Ortalyq Aziia elderiniń Reseimen saýda kólemi barlyq taýar ainalymynyń úshten birin quraidy. Ótken jyldyń qorytyndysy boiynsha bul kórsetkish 20 paiyz ósip, 50 milliard dollardan asty. Atalǵan kólemniń jartysynan kóbi Qazaqstan men Resei arasyndaǵy saýdaǵa tiesili. Byltyr onyń kólemi 28 milliard dollarǵa jetti. Resei Qazaqstan ekonomikasyna qarjy quiǵan iri investorlardyń qataryna endi. Investitsiia kólemi 26 milliard dollardan asty. Byltyrdyń ózinde Reseiden tikelei keletin investitsiia aǵyny 33 paiyz ulǵaiyp, 4 milliardtan asa dollarǵa kóbeigen. Oǵan ónerkásip kooperatsiiasyn jedel damytý múmkindik berdi. Jalpy quny 21 milliard dollardy quraityn 114 investitsiialyq joba júzege asyryldy. Qazirgi ýaqytta 33 joba boiynsha jumys júrip jatyr. Onyń investitsiia kólemi 4,5 milliardtan astam dollardy quraidy, – dedi Memleket basshysy.
Qasym-Jomart Toqaevtyń aitýynsha, taraptar saýda kedergilerin joiýdy, ózara saýdany jandandyrýdy jáne taýar ainalymy nomenklatýrasyn keńeitýdi qoldaidy.
– Shekaralyq saýda aimaǵyn qurý, turaqty túrde shekaralyq aimaqtyq forýmdar, biznes-forýmdar, kórmeler men jármeńkeler ótkizý, elektrondyq saýda alańyn damytý bul mindetterdi sheshýge yqpal etedi. Qazirgi ýaqytta Ortalyq Aziiada birlesken saýda-ónerkásip aimaqtary men indýstrialdyq habtar qalyptasa bastady. Bul alańdarda óndiris lokalizatsiiasyna, qosylǵan qunnyń barlyq tizbegi boiynsha kooperatsiiaǵa jáne turaqty tasymaldy qamtamasyz etýge jaǵdai jasalady. Reseilik biznestiń atalǵan jobalarǵa qatysýy Resei taýarlarynyń bizdiń, sonyń ishinde Qazaqstan naryǵynda uzaq ýaqyt boiy ainalymda bolýyna yqpal etedi, – dedi Prezident.
