Memleket basshysy Qasym-Jomart Toqaev BAÁ prezidenti sheih Muhammed ben Zaid Ál Nahaianmen kezdesti, - dep habarlaidy "Ult aqparat" Aqorda saityna silteme jasap.
Memleket basshysy Qasym-Jomart Toqaev BAÁ prezidenti sheih Halifa ben Zaid Ál Nahaiannyń qaitys bolýyna bailanysty osy eldiń jańadan sailanǵan prezidenti, Abý Dabidiń bileýshisi sheih Muhammed ben Zaid Ál Nahaianǵa jáne bileýshi áýlettiń músheleri men Ámirlikter halqyna kóńil aitý úshin Birikken Arab Ámirlikterine keldi. Kóshbasshylardyń kezdesýi Abý Dabidegi Qasrý-l Mýshrif Prezident saraiynda ótti.
Prezident Qazaqstan halqynyń jáne jeke óziniń atynan kóńil aityp, sheih Halifanyń eldi órkendetý jolyndaǵy eren eńbegin atap ótti.
"Ámirlikterdiń el ishindegi jáne halyqaralyq deńgeidegi kóptegen jetistigi sheih Halifanyń esimimen bailanysty. Onyń dana basshylyǵymen BAÁ Taiaý Shyǵystaǵy beibitshilik pen turaqtylyqtyń kúshti jaqtaýshysy boldy, sonymen qatar búkil arab álemi úshin qarqyndy ekonomikalyq ósý men áleýmettik damýdyń úlgisi boldy. Sondyqtan biz onyń qaitys bolýyn BAÁ úshin ǵana emes, búkil álem qoǵamdastyǵy úshin orasan zor qaiǵy dep qabyldaimyz", - dedi Qasym-Jomart Toqaev.
Memleket basshysy sheih Halifa ben Zaid Ál Nahaiannyń Qazaqstan men Ámirlikter arasyndaǵy qatynastardy damytýǵa eleýli úles qosqanyn da aitty.
Kezdesý barysynda Qasym-Jomart Toqaev sheih Muhammed ben Zaid Ál Nahaiandy BAÁ prezidenti bolyp sailanýymen quttyqtap, onyń basshylyǵymen ámirlikterdiń odan ári gúldene beretinine senim bildirdi.
BAÁ prezidenti óz kezeginde osyndai aýyr jaǵdaida arnaiy kelip, jeke qoldaý kórsetkeni úshin Qazaqstan kóshbasshysyna rizashylyǵyn bildirdi, sondai-aq elorda kósheleriniń birine sheih Halifanyń aty beriletinine alǵysyn aitty.
Kóshbasshylar eki memleket arasyndaǵy yntymaqtastyqty jan-jaqty nyǵaitýǵa ózara nietti ekenin naqtylady.
