Memleket basshysy Qasym-Jomart Toqaev Ázerbaijan Prezidenti Ilham Álievpen kezdesti, dep habarlaidy "Ult aqparat" Aqordanyń resmi saityna silteme jasap.
Ázerbaijan Prezidentiniń «Zagýlba» rezidentsiiasynda Memleket basshysyn saltanatty resmi qarsy alý sharasy ótti.
Qurmet Qaraýylynyń bastyǵy eki el basshylaryna raport berip, Qazaqstan men Ázerbaijannyń ánurandary oryndalǵannan keiin Qasym-Jomart Toqaev pen Ilham Áliev bir-birine resmi delegatsiialardyń quramyn tanystyrdy. Saltanatty rásimnen soń eki el prezidentteri kelissóz júrgizdi.
Qazaqstan Prezidenti Ázerbaijan Respýblikasyna resmi saparmen kelýge shaqyrǵany úshin Ilham Álievke alǵys aitty.
– Eń aldymen bizge kórsetken qonaqjailyǵyńyz úshin sizge rizashylyǵymdy bildiremin. Bul – Qazaqstan Prezidenti retinde alǵash ret resmi saparmen kelýim. Bul sapardyń men úshin mán-mańyzy airyqsha. Búgin birqatar óte ózekti máseleler týraly pikir almasýlar bolady. Kelissózder nátijesinde birqatar qujatqa qol qoiylmaq. Ol ekijaqty yntymaqtastyqty, qazaq-ázerbaijan qarym-qatynasyn jańa deńgeige kóteredi dep senemin, – dedi Qasym-Jomart Toqaev.
Ilham Áliev óziniń shaqyrýyn qabyl alyp, Ázerbaijanǵa resmi saparmen kelgeni úshin Qasym-Jomart Toqaevqa rizashylyǵyn bildirip, Qazaqstan Prezidentiniń Bakýǵa kelýi eki el arasyndaǵy yntymaqtastyqqa tyń serpin beretinin atap ótti.
Jeke kelissózden keiin Qasym-Jomart Toqaev qazaq-ázerbaijan qarym-qatynastaryna qosqan zor úlesi úshin Ilham Álievti Qazaqstan Respýblikasynyń joǵary memlekettik nagradasy «Altyn Qyran» ordenimen marapattady. Bul marapat Ilham Álievke eki el arasyndaǵy dostyq pen yntymaqtastyqty nyǵaitýǵa zor úles qosqany úshin tabys etildi.
