Qasym-Jomart Toqaev Arys qalasyndaǵy evakýatsiialyq pýnktke bardy, dep habarlaidy "Ult aqparat".
Memleket basshysy tótenshe jaǵdai bolǵan aimaqtan kóshirilgen turǵyndardy ornalastyrý boiynsha atqarylyp jatqan jumystardyń barysymen tanysty. Prezident qaýipsiz jerlerge kóshirilgen Arys qalasynyń turǵyndaryn ystyq tamaqpen, meditsinalyq járdemmen qamtamasyz etip, basqa da barlyq qajetti kómek kórsetýdi tapsyrdy.
Qasym-Jomart Toqaev azamattardyń qaýipsizdigi men olardyń dúnie-múlikteriniń saqtalýyn baqylaýda ustaý qajettigin eskertti. Memleket basshysy Ishki ister ministrligine, ásirese balalarǵa erekshe kóńil bólýdi tapsyrdy.
«Osy tártippen jumysty jalǵastyryńyzdar. Úkimetke qalaǵa jáne onyń turǵyndaryna kómektesý týraly tapsyrma berildi. Qazir biz eń birinshi kezekte adamdardyń, qala turǵyndarynyń qaýipsizdigin qamtamasyz etýimiz kerek. Ekinshi – kórsetiletin kómekter. Arnaiy qor quryldy. Arysqa búkil Qazaqstan kómektesedi. Men halyqpen jumys istep jatqan qalanyń jurtshylyǵyna, ardagerlerge rizashylyǵymdy bildiremin. Jarylystyń sebepterin anyqtaý qajet. Qylmystyq is qozǵaldy, tergeý-tekserý bastaldy. Eger kináliler bolsa, olar zańmen qatań jazalanady. Aldaǵy ýaqytta Arys jarylǵysh qurylǵylardyń barlyǵynan tazartylýy tiis.
Qala qalpyna keltiriledi, bári durys bolady. Bul tótenshe jaǵdai, apat. Qaitemiz, keibir ýaqytta solai bolady. Úkimet aqsha, qarajat beredi, kómektesedi, alańdamańyzdar! Bári jaqsy bolady. Jóndeý jumystaryn jasap beremiz. Úkimet qansha qarajat kerek ekenin sanaidy. Sodan keiin qarajat bólemiz. Bárin túsinip otyrmyn, bári jaqsy bolady. Ádeii kelip otyrmyn», - dedi Memleket basshysy turǵyndarmen kezdesýi barysynda.
Memleket basshysynyń baspasóz hatshysy Berik Ýáli facebook-taǵy paraqshasynda Qorǵanys ministri Nurlan Ermekbaevtyń Prezidentke Arystaǵy jaǵdaidy baiandap turǵan sátinen sýretter jariialady.
