Qasym-Jomart Toqaev Túrikmenstanda ótken Ortalyq Aziia elderi basshylarynyń Konsýltativtik kezdesýine qatysty. Qazaqstan Prezidenti Ortalyq Aziiany turaqty, ekonomikalyq jaǵynan damyǵan, órkendegen óńirge ainaldyrýǵa baǵyttalǵan ekonomika, saýda, mádeniet salalary boiynsha birqatar bastama kóterdi.
Bul týraly Prezidenttiń baspasóz hatshysy Berik Ýáli Facebook-tegi paraqshasynda jazdy.
«Memleket basshysy aimaqtyń kólik dálizderine integratsiialanǵan taýar ótkizýdiń biryńǵai jelisin jáne Aqtaý ailaǵynyń bazasynda «konteinerlik hab» ashýdy usyndy. Prezident óz sózinde Ortalyq Aziiadaǵy kólik kommýnikatsiialaryn damytý elderimizdegi ishki jalpy ónimdi 15 paiyzǵa arttyrýǵa múmkindik beretinin atap ótti», delingen habarlamada.
Qasym-Jomart Toqaev aimaqtyń negizgi máseleleriniń biri retinde – sý resýrstarymen qamtamasyz etý dep esepteidi. Onyń aitýynsha, máselelerdi sýdy teń dárejede paidalaný, taraptardyń múddelerin eskerý, ózara mindetterdi iske asyrý qaǵidatyna súiene otyryp sheshý qajet.
«Sý – Ortalyq Aziia elderiniń arasyna syna qaǵatyn emes, kerisinshe, biriktiretin resýrs bolýy kerek», –dedi Memleket basshysy.
Qazaqstan Prezidenti jumys sapary aiasynda Túrikmenstan basshysy Gýrbangýly Berdimuhamedovpen kezdesti. Taraptar ekijaqty strategiialyq yntymaqtastyqtaǵy keń aýqymdy máselelerdi talqylady. Saýda-ekonomikalyq jáne gýmanitarlyq yntymaqtastyqty odan ári tereńdetýdiń perspektivalaryn aiqyndady.
