QR Prezidenti Qasym-Jomart Toqaev 9 jastaǵy mektep oqýshysynyń estafetasyn qabyl aldy. Bul týraly búgin óziniń facebook-tegi paraqshasynda Memleket basshysynyń baspasóz hatshysy Berik Ýáli jazdy, dep habarlaidy "Ult aqparat".
«Láilim-Shyraq esimdi 9 jastaǵy mektep oqýshysy qazaqtyń uly aqyny Abai óleńderinen úzindi oqyp, bul estafetany jalǵastyrýdy Qazaqstan Respýblikasynyń Prezidenti Qasym-Jomart Toqaevqa joldaǵan eken. Memleket basshysy Láilim-Shyraqtyń bul usynysyn zor qýanyshpen qabyldap, kemeńger aqynnyń jastardy bilim men ǵylymǵa shaqyratyn, maqsatyńa jetý jolynda qajet asyl qasietterdi atap kórsetken «Ǵylym tappai maqtanba» atty óleńinen úzindi oqyp, jaýap berdi», - dep jazdy Berik Ýáli.
Onyń jazýynsha, Memleket basshysy Abai óleńderin oqý estafetasyn odan ári Bilim jáne ǵylym ministri Ashat Aimaǵambetovke, Mádeniet jáne sport ministri Aqtoty Raiymqulovaǵa jáne búkil álemdi moiyndatqan talantty ánshi Dimash Qudaibergenge joldady.
Aita ketsek, áleýmettik jelilerde qazaqtyń uly aqyny Abaidyń óleńderin oqý naýqany bastaldy. Bul challenge-di jeli qoldanýshylary taratyp jatyr. Challenge #abai175 heshtegimen belgilengen. Qazirgi ýaqytta jariialanymdar sany kún saiyn artýda.
Sondai-aq, QR Prezidenti mamyr aiynda Abaidyń 175 jyldyq mereitoiy týraly Jarlyqqa qol qoiǵan bolatyn.
