Memleket basshysy Qasym-Jomart Toqaev Sheteldik investorlar keńesiniń otyrysynda Qazaqstannyń shikizattyq emes eksportty damytý josparyn málim etti, dep habarlaidy QazAqparat.
«Bizdiń ekonomikalyq model ishki tutyný investitsiiasynan bólek eksportty damýdyń mańyzdy faktory retinde qarastyrady. Biz óńdeý ónerkásibiniń qosymsha eksporttyq áleýetin 10 mlrd dollarǵa, qyzmet kórsetý salasynyń eksporttyq áleýetin taǵy 10 mlrd dollarǵa baǵalaimyz. Orta merzimdi maqsat 2025 jylǵa qarai shikizattyq emes eksport kólemin, onyń ishinde qyzmetter qosa otyryp, 41 mlrd dollarǵa deiin ulǵaitý bolyp tabylady», - dedi Prezident.
Sondai-aq, Memleket basshysy investorlarmen jumysty jandandyrýda Saýda jáne integratsiia ministrliginiń jumysy mańyzdy ekenin atady.
«Osy áleýetterdi paidalaný úshin naqty sharalar qabyldanyp otyr. Birinshiden, qajetti instýtitsionaldyq negiz quryldy. 2019 jyly arnaiy ókiletti organ – Saýda jáne integratsiia ministriligi quryldy. Ony ózderińiz bilesizder. Qazir bul vedomstvo otandyq eksporttaýshylarǵa qoldaýdyń tolyq paketin usynyp otyr. Bul – qarjylyq jáne qarjylyq emes qoldaýdyń 20 quraly», - dedi Qasym-Jomart Toqaev.
