Aqtaý nemese Quryq porttarynda jeke jolaýshylar terminalynyń qurylysyn qaraý úshin jetkilikti jolaýshylar aǵyny baiqalmaidy. Bul jaiynda Senat depýtattarynyń saýalyna QR Premer-Ministri Asqar Maminniń jaýabynda aitylǵan, dep habarlaidy QazAqparat.
«Qazirgi tańda QR Indýstriia jáne infraqurylymdyq damý ministirligi aqparatyna sáikes, Aqtaý nemese Quryq porttarynda jeke jolaýshylar terminalynyń qurylysyn qaraý úshin jetkilikti jolaýshylar aǵyny baiqalmaidy. Bul rette, Aqtaý jáne Quryq teńiz porttarynyń qoldanystaǵy infraqurylymy aralas «ózen-teńiz» júzý aýdanynyń jolaýshylar kemelerin(«Uly Petr» teplohody siiaqty) qabyldaýǵa múmkindik beredi. Aqtaý portyndaǵy №8 paromdyq ailaq (ailaq qabyrǵasynyń uzyndyǵy - 130 metr, tereńdigi - 5 metr) jáne Quryq portyndaǵy avtoparomdyq ailaq (ailaq qabyrǵasynyń uzyndyǵy - 174 metr, tereńdigi – 6,5 metr) jolaýshylar kemesin qabyldaýǵa arnalǵan. 2022 jyldyń 2 jartyjyldyǵyna Kaspii teńizi boiynsha Aqtaý jáne Astrahan qalalary arasynda «Uly Petr» krýizdik kemesin iske asyrý josparlanǵan», - delingen Úkimet basshysynyń jaýabynda.
Onyń atap ótýinshe, Quryq portynda jolaýshylardy ótkizý pýnkti men kedendik baqylaý aimaǵy jumys isteidi.
«Ol is júzinde teńiz vokzalynyń qyzmetin atqarady. Ǵimaratta teńiz vokzaldarynda kózdelgen barlyq fýnktsionaldyq aimaqtar (baqylaý-ótkizý pýnktteri, kútý zaly, bilet kassasy, valiýta aiyrbastaý pýnkti, qonaq úi, ashana, kafeterii jáne t.b.) bar. Ótkizý qabileti jylyna 90 myń jolaýshyny quraidy», - dedi Premer-Ministr.
