Kaspii teńiziniń jaǵalaýynda 550 gektar aýmaqtyń qamysy órtengen, dep habarlaidy QazAqparat.
Atyraý oblystyq tótenshe jaǵdailar departamenti baspasóz qyzmetiniń málimetine súiensek, búgin, 11 qazanda jergilikti ýaqytpen saǵat 12:00-ge deiin jaǵalaýdaǵy qamys órtiniń eki frontaldy janý oshaǵy anyqtalǵan.
«Onyń biri Isatai men Qurmanǵazy aýdanynyń shekarasyndaǵy Maqash aýyldyq okrýginiń, al, ekinshisi Teńiz aýyldyq okrýginiń aýmaǵynda ornalasqan. Órtengen aýmaq 550 gektardy quraidy. Búginge deiin 420 gektar aýmaqtyń órti sóndirildi. Onyń ishinde sý aǵyzý qurylǵysynyń kómegimen 35 gektarda, jeke quramnyń kúshimen 197 gektarda janǵan jalyn joiyldy. Al, 188 gektardyń órti ózdiginen sóndi» -dep habarlady departamenttiń baspasóz qyzmeti.
Kaspii teńiziniń jaǵalaýyndaǵy qamys órtin sóndirýge «Qazaviaqutqarý» AQ-nyń tikushaǵymen aerovizýaldy tekserý júrgizilgen. Tikushaqtyń sý shashý qurylǵysymen 21 ret sý tógildi. Jalyndy sóndirý úshin tógilgen sýdyń mólsheri 63 tonnany quraǵan.
Búgin órtti sóndirýge Atyraý oblystyq tótenshe jaǵdailar departamentiniń jeke quramynan 34 adam, 5 tehnika, 4 motosorǵysh, 1 generator, 40 jeń, 1 úrlemeli shatyr, O.Kóshekov atyndaǵy Atyraý agrarlyq-tehnikalyq kolledjinen 1 adam, 1 John Deere-6135b traktory, sondai-aq, «Qazaviaqutqarý» AQ-nyń 5 qyzmetkeri men «MI-871» tikushaǵy jumylǵan.
