Mańǵystaý oblysy boiynsha Ekologiia departamenti Aqtaý qalasyndaǵy «Aktau tourism city ltd» kompaniiasynyń filialyna qatysty Kaspii teńizi men Qarakól kóline sarqyndy sýlardy aǵyzý faktisi boiynsha jospardan tys tekserý júrgizdi. Bul týraly QazAqparat Ekologiia ministrligine silteme jasap habarlaidy.
Tekserý barysynda sarqyndy sýlardy aǵyzý faktisi rastalyp, QR Ekologiialyq kodeksiniń 222-baby 8-tarmaǵynyń talaptary buzylǵany anyqtaldy.
Búgingi tańda kompaniia dihlorlanǵan basseindik sý jiberý qubyryn bólshektedi, ekinshi qubyrdy bólshekteý jumystary júrgizilýde. Bul sharalar Ekologiia departamentimen berilgen nusqamalar sheńberinde atqaryldy.
Kompaniia basseindik sý men tushylandyrý qondyrǵysynda teńiz sýyn tazartqannan keiingi sýdy jiberýdi júzege asyrǵanyn atap ótken jón.
Sonymen qatar, sý synamalaryn taldaý nátijeleri kórsetkendei, ólshengen zattar, nitrattar men hloridter boiynsha normativterden aýytqýshylyq belgilendi. Bul fakt Ekokodekstiń 39-baby 9-tarmaǵynyń talaptaryna qaishy.
2021 jylǵy 15 qyrkúiekten bastap KTQ boiynsha tehnikalyq problemalarǵa bailanysty kompaniia sarqyndy sýdy biologiialyq turǵydan tazartýdy júrgizgenbegen. Osylaisha, Kodekstiń 393-baby 1-tarmaǵynyń talaptary men jobalyq sheshimder saqtalmaǵan.
Tekserý nátijeleri boiynsha «Aktau tourism city ltd» kompaniiasyna qatysty QR Ákimshilik quqyq buzýshylyq týraly kodeksiniń 324, 325, 326, 328, 331, 332 baptary boiynsha 6 ákimshilik is qozǵaldy.
Ekologiia departamenti «Mańǵystaý oblysynyń Tabiǵi resýrstar jáne tabiǵat paidalanýdy retteý basqarmasy» MM-ne kompaniiaǵa buǵan deiin berilgen qorshaǵan ortaǵa emissiia berý ruqsatyn keri qaitaryp alý máselesi boiynsha hat joldady.
